Farg‘ona viloyatining Quvasoy shahri hamda Namangan viloyatining Uchqo‘rg‘on tumanida kredit mablag‘larini o‘zlashtirish holati fosh etildi, deb xabar beradi Bosh prokuratura huzuridagi departament.
Ma’lum qilinishicha, departamentning Quvasoy shahar bo‘limi tomonidan tergovga qadar tekshiruv o‘tkazilgan. Tekshiruv davomida “Z.N” dehqon xo‘jaligi rahbari G‘.A. va boshqalar hududiy tijorat bankidan 10 nafar fuqaroning nomiga ularning xabardorligisiz issiqxona qurish uchun 286,2 million so‘m kredit ajratilishiga erishib, kredit mablag‘ini o‘zlashtirish yo‘li bilan talon-toroj qilgani aniqlangan.
Shuningdek, departamentning Uchqo‘rg‘on tuman bo‘limi tomonidan o‘tkazilgan tergovga qadar tekshiruvda “J.M.” MCHJ rahbari S.Yu. 4 nafar fuqaroning nomiga rasmiylashtirilgan 119,9 million so‘m kredit mablag‘ini jamiyat hisob-raqamiga o‘tkazishga erishib, kredit mablag‘ini o‘zlashtirish yo‘li bilan talon-toroj qilgan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Zangiotada 5,9 milliard so‘m imtiyozli kredit mablag‘larini talon-toroj qilgan rahbarlar aniqlangani, Samarqandda o‘zgalar nomiga 156 million so‘m kredit rasmiylashtirgan sobiq bank xodimiga jinoyat ishi ochilgani to‘g‘risida xabar berilgandi.
Izoh (0)