Sirdaryo viloyatida o‘zgalar nomiga onlayn kredit rasmiylashtirib kelgan shaxs qo‘lga olindi, deb xabar beradi IIV Kiberxavfsizlik markazi.
Qayd etilishicha, Toshkent viloyati Bektemir tumanida yashovchi 28 yoshli (ayol) R.T. IIOga murojaat qilib, uning nomiga nomaʼlum shaxs tomonidan 30 million so‘m miqdorida onlayn kredit rasmiylashtirilganini maʼlum qilgan.
Tezkor-qidiruv xizmati Kiberxavfsizlik bo‘linmalari xodimlari tomonidan o‘tkazilgan tezkor-qidiruv tadbirlari natijasida, mazkur jinoyatni Sirdaryo viloyati Sardoba tumanida yashovchi 30 yoshli N.F. sodir etgani aniqlangan.
Gumon qilinuvchi sifatida tergov harakatlariga jalb etilgan N.F. (ayol) R.T.ga Telegram orqali havola jo‘natib, uni qiziqtirib, bank karta maʼlumotlarini qo‘lga kiritgan va uning nomiga onlayn kredit rasmiylashtirgan. So‘ng pullarni boshqa bank karta hisob raqamiga o‘tkazib olgan.
Mazkur holat yuzasidan Jinoyat kodeksining 169-moddasi (o‘g‘rilik) 3-qismi “b” bandi bilan jinoyat ishi qo‘zg‘atilib, N.F.ning sodir etilib fosh etilmay qolgan boshqa shu turdagi jinoyatlarga aloqadorligini tekshirish yuzasidan tezkor-surishtiruv ishlari olib borilmoqda.
Bundan oldin Surxondaryo viloyatining Oltinsoy va Termiz tumanlarida 11 milliard so‘mdan ortiq kredit mablag‘larini o‘zlashtirgan MCHJ rahbarlari aniqlangandi. Shuningdek, Surxondaryo va Farg‘onada oilaviy korxonalar rahbarlari 1,2 milliard so‘mdan ortiq imtiyozli kreditlarni talon-toroj qilgani to‘g‘risida xabar berilgan edi.
Izoh (0)