Andijon shahrida belgilanmagan joyga chiqindi tashlashni oldini olishda xizmat qilishi uchun 34 dona 360 graduslik zamonaviy videokuzatuv kameralari ishga tushirilmoqda. Bu haqda viloyat hokimligi matbuot xizmati xabar berdi.
O‘zbekistonda belgilanmagan joyga chiqindi tashlaganlik uchun jismoniy shaxslar 340 ming so‘mdan — 1 million 20 ming so‘mgacha, mansabdor shaxslar esa 3 million 400 ming so‘mdan — 6 million 800 ming so‘mgacha jarimaga tortiladi.
2023-yilning iyulida Toshkent shahri va Toshkent viloyatidagi noqonuniy chiqindi tashlanadigan joylarga 25 ta zamonaviy kameralar o‘rnatilgandi. Sentyabr oyiga kelib bu turdagi kameralarni Namanganda ham o‘rnatish boshlangan edi. Ushbu kameralar belgilanmagan joylarga chiqindi tashlayotgan shaxslarni aniqlash va ularga chora ko‘rish imkoniyatini beradi.
O‘zbekistonda chiqindi poligonlari
O‘zbekistonda 2023-yilda qurilish chiqindi poligonlarini qurish uchun byudjetdan qariyb 28 milliard so‘m, tibbiyot chiqindilarini zararsizlantirish uchastkalarini qurish uchun 50 milliard so‘m ajratiladi.
2023—2025-yillar uchun tasdiqlangan manzilli dasturlarga asosan 29 ta qattiq maishiy chiqindi poligonini rekultivatsiya qilish, 437 ta chiqindi yig‘ish shoxobchalarini qurish, 26 ta qurilish chiqindi poligonini tashkil etish, ijtimoiy soha obyektlariga 18 867 ta chiqindi konteyneri xarid qilish, 38 ta qattiq maishiy chiqindilarni qayta yuklash stansiyasini tashkil etish, 60 ta tibbiyot chiqindilarini zararsizlantirish uchastkasini tashkil etish hamda saralash uskunalarini o‘rnatish uchun jami 1,1 trillion so‘m mablag‘ moliyalashtirilishi rejalashtirilmoqda.
Izoh (0)