Андижон шаҳрида белгиланмаган жойга чиқинди ташлашни олдини олишда хизмат қилиши учун 34 дона 360 градуслик замонавий видеокузатув камералари ишга туширилмоқда. Бу ҳақда вилоят ҳокимлиги матбуот хизмати хабар берди.
Ўзбекистонда белгиланмаган жойга чиқинди ташлаганлик учун жисмоний шахслар 340 минг сўмдан — 1 миллион 20 минг сўмгача, мансабдор шахслар эса 3 миллион 400 минг сўмдан — 6 миллион 800 минг сўмгача жаримага тортилади.
2023 йилнинг июлида Тошкент шаҳри ва Тошкент вилоятидаги ноқонуний чиқинди ташланадиган жойларга 25 та замонавий камералар ўрнатилганди. Сентябрь ойига келиб бу турдаги камераларни Наманганда ҳам ўрнатиш бошланган эди. Ушбу камералар белгиланмаган жойларга чиқинди ташлаётган шахсларни аниқлаш ва уларга чора кўриш имкониятини беради.
Ўзбекистонда чиқинди полигонлари
Ўзбекистонда 2023 йилда қурилиш чиқинди полигонларини қуриш учун бюджетдан қарийб 28 миллиард сўм, тиббиёт чиқиндиларини зарарсизлантириш участкаларини қуриш учун 50 миллиард сўм ажратилади.
2023—2025 йиллар учун тасдиқланган манзилли дастурларга асосан 29 та қаттиқ маиший чиқинди полигонини рекултивация қилиш, 437 та чиқинди йиғиш шохобчаларини қуриш, 26 та қурилиш чиқинди полигонини ташкил этиш, ижтимоий соҳа объектларига 18 867 та чиқинди контейнери харид қилиш, 38 та қаттиқ маиший чиқиндиларни қайта юклаш станциясини ташкил этиш, 60 та тиббиёт чиқиндиларини зарарсизлантириш участкасини ташкил этиш ҳамда саралаш ускуналарини ўрнатиш учун жами 1,1 триллион сўм маблағ молиялаштирилиши режалаштирилмоқда.
Изоҳ (0)