Farg‘ona viloyati Oltiariq tumanida subsidiya mablag‘larini o‘zlashtirgan fermer xo‘jaliklari aniqlandi, deb xabar beradi Bosh prokuratura huzuridagi departament.
Qayd etilishicha, departamentning Oltiariq tuman bo‘limi tomonidan tergovga qadar tekshiruvlar o‘tkazilgan. Tekshiruvlar davomida “A.S.” hamda “I.Y.” fermer xo‘jaliklari masʼul shaxslari “M.B.” xususiy korxonasi rahbari R.M. bilan o‘zaro til biriktirib, ushbu fermer xo‘jaliklari yer maydonlariga haqiqatda o‘rnatilmagan 14 629 dona shpaler (o‘simliklarni tutib turishga mo‘ljallangan konstruksiya) uchun jami 219,3 million so‘m miqdorida subsidiya mablag‘lari ajratilishiga erishib, ushbu mablag‘larni “M.B.” xususiy korxonasi orqali naqdlashtirib olgani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Xorazm viloyatida 1,4 milliard so‘m kredit mablag‘ini noqonuniy chetga olib chiqqan shaxslar aniqlangani to‘g‘risida xabar berilgandi.
Izoh (0)