Toshkent viloyatida belgilanmagan joyga qurilish chiqindilarini ikkinchi marta to‘kib ketgan fuqaroning transport vositasi musodara qilinadi. Bu haqda Ekologiya, atrof-muhitni muhofaza qilish va iqlim o‘zgarishi vazirligi matbuot xizmati xabar berdi.
Ma’lum qilinishicha, Toshkent tumani “Qorasaroy” mahallasidan oqib o‘tuvchi suv bo‘yiga qurilish chiqindilari to‘kib ketilgan. Holat ushbu hududdagi xonadonlardan biriga o‘rnatgan kuzatuv kamerasiga tushib qolgan.
Toshkent viloyati Ekologiya boshqarmasi xodimlari tomonidan tezkor ekologik surishtiruv ishlari natijasida “Qorasaroy” MFY, Istiqolol ko‘chasida yashovchi fuqaro A.T. “Zil” rusumli yuk avtotransportida qurilish chiqindilarini belgilanmagan joyga to‘kkani aniqlangan.
Qayd etilishicha, A.T. avval ham shunday huquqbuzarlik sodir etgan va 7-sentabr kuni Ma’muriy javobgarlik to‘g‘risidagi kodeksning 91-1-moddasi, 3-qismi bilan dalolotnoma tuzilib, bazaviy hisoblash miqdorining besh barobarida — 1 million 650 ming so‘m jarima qo‘llanilgan. Oradan sakkiz kun o‘tib esa fuqaro tomonidan takror huquqbuzarlik sodir etilgan.
Qonunchilikka ko‘ra, huquqbuzarlik maʼmuriy jazo chorasi qo‘llanilganidan keyin bir yil davomida takror sodir etilgan bo‘lsa, huquqbuzarlik quroli musodara qilinishi belgilab qo‘yilgan.
Shunga asosan, ayni damda A.T.ning transport vositasi vaqtincha saqlash uchun jarima maydonchasiga qo‘yilib, musodara qilinishi yuzasidan hujjatlar to‘planib, sudga da’vo arizasi kiritilmoqda.
Bundan oldin Navoiy shahrida belgilanmagan joyga chiqindi tashlaganlar 10 million so‘mdan ortiq jarimaga tortilgani, Zangiotadagi kanal atrofiga chiqindi tashlagan “Maxsustrans” haydovchisi ishdan olingani to‘g‘risida xabar berilgandi.
Izoh (0)