Samarqandda hujjatsiz sotilayotgan 103 mln so‘mlik alkogol mahsulotlari olib qo‘yildi, deb xabar bermoqda Iqtisodiy jinoyatlarga qarshi kurashish departamenti axborot xizmati.
Unga ko‘ra, holat Bosh prokuratura huzuridagi departamentning Samarqand shahar bo‘limi tomonidan viloyat IIB xodimlari bilan hamkorlikda o‘tkazilgan tezkor tadbirda aniqlangan. “A.h.” MCHJ do‘koni sotuvchisi X.D. 31 xil turdagi hech qanday hujjatsiz umumiy bahosi 103,0 million so‘mlik jami 2 731 dona alkogol mahsulotlarini sotuvga qo‘ygani aniqlanib, ushbu alkogol mahsulotlari ashyoviy dalil sifatida olingan.
Shu kabi, departamentning Qarshi shahar bo‘limi tomonidan o‘tkazilgan tezkor tadbirda fuqarolar Q.I. va S.S. qalbaki aksiz markali “Yangi-Shahrisabz”, “Ne vodka” va “Vodka Exclusive” nomli jami 696 dona alkogol mahsulotlarini fuqaro M.O.ga sotish maqsadida olib kelgan vaqtlarida ashyoviy dalillar bilan ushlangan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)