Toshkent viloyatining Zangiota tumanida 36 million so‘mlik aksiz markasiz tamaki mahsulotlarining muomalaga kiritilishining oldi olindi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Unga ko‘ra, holat Bosh prokuratura huzuridagi departamentning Zangiota tuman bo‘limi tomonidan soliq inspeksiyasi xodimlari bilan hamkorlikda o‘tkazilgan tezkor tadbirda aniqlangan. Fuqarolar T.B. va S.S. noqonuniy daromad orttirish maqsadida hech qanday hujjatsiz jami 3 xil turdagi 2 200 quti Esse change, “Oris” va “Milano” nomli aksiz markasiz tamaki mahsulotini fuqaro Q.D.ga 36,7 million so‘mga sotgan vaqtida ushlanib, ularning yonidan jami 5 190 quti aksiz markasiz tamaki mahsulotlari ashyoviy dalil sifatida olingan.
Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)