Toshkent shahrida “Baxti Tashkentskiy” laqabi bilan tanilgan Baxtiyor Qudratullayevning akasi Shuxrat Qudratullayev qo‘lga olindi, deb xabar beradi “Kun.uz” nashri.
2023-yilning dekabr boshlarida O‘zbekistonda jinoiy guruhlar a’zolarini qo‘lga olish bo‘yicha ommaviy reydlar o‘tkazildi. Jumladan, “Baxti Tashkentskiy” qo‘lga olingandi. U Ma’muriy javobgarlik to‘g‘risidagi kodeksning 183-moddasi (mayda bezorilik) va 194-moddasi (IIO xodimini qonuniy talabini bajarmaslik) 1-qismida nazarda tutilgan maʼmuriy huquqbuzarliklarni sodir etganlikda aybli deb topilgan. Sud qarori bilan unga 15 sutka ma’muriy qamoq jazosi tayinlangan edi.
Baxtiyor Qudratullayev bilan birga yana ikki shaxs — Dilshod Sharipov va Anvar Mirzaxanovlar hibsga olindi. 24-dekabrda esa Baxtiyor Qudratullayevning o‘g‘li va guruhning yana bir qancha aʼzolari, jumladan, Nargiza Jumaniyazova ham hibsga olingandi.
58 yoshli Shuxrat Qudratullayev oldinroq Jinoyat kodeksining 165-moddasi (tovlamachilik) bilan tergov qilinayotgan jinoyat ishi doirasida tergovdan qochib yashiringan edi. U bilan birga yana ikki kishi – 1964-yilda tug‘ilgan Husan Isomiddinov hamda 1988-yilda tug‘ilgan Feruz Vapayevga nisbatan ham qidiruv e’lon qilingandi.
Izoh (0)