Global ekologik fond (GEF) Markaziy Osiyo mamlakatlari o‘rtasida ekotizimlarni tiklash sohasida hamkorlikni mustahkamlash uchun 26 mln dollar grant ajratadi. Bu haqda Ekovazirlik matbuot xizmati xabar bermoqda.
Maʼlum qilinishicha, 13-fevral kuni ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov va Global ekologik fond (GEF) rahbari Karlos Rodriges o‘rtasida uchrashuv bo‘lib o‘tgan.
“Markaziy Osiyo vazirlari ekotizimlarni tiklash va iqlim o‘zgarishining oldini olish bo‘yicha mintaqaviy hamkorlikka tayyor. Beshta davlat bir-biriga bog‘langan, Markaziy Osiyo mintaqasi esa bir ekotizimdir”, — degan vazir.
Fond kengashining 66-yig‘ilishi doirasida Ekotizimni tiklash, tabiiy resurslarni boshqarishni yaxshilash va mustahkamlikni oshirish uchun Markaziy Osiyo suv va quruqlik aloqalari (CAWLN) mintaqaviy dasturining 5 ta loyihasiga 26 mln dollar ajratilgan. Umumiy qiymati 18,6 mln dollar bo‘lgan beshta loyihadan to‘rttasi O‘zbekiston ishtirokida BMTning Oziq-ovqat va qishloq xo‘jaligi (BMT FAO) ko‘magida amalga oshiriladi.
Bu loyihalarga Markaziy Osiyoning zaif ekotizimlarida yerlarni tiklash, Amudaryo, Zarafshon, Panj, Sirdaryo va Norin daryolari havzalarida suv resurslarini kompleks boshqarishni kuchaytirish, ekotizimlar va bioxilma-xillikni saqlashni yaxshilash uchun tabiiy resurslarni kompleks boshqarish kabilar kiradi.
Muzokaralar chog‘ida 2025-yilda O‘zbekistonda GEF assambleyasini o‘tkazish, Ochiq dengiz bo‘yicha xalqaro shartnoma, Central Asian Green University bilan hamkorlik qilish va boshqa masalalar muhokama qilingan.
Izoh (0)