Angrenda suv ta’minoti tizimiga noqonuniy ulangan korxona 830 mln so‘mdan ziyod zarar yetkazdi

Toshkent viloyati Angren shaharida markazlashtirilgan kommunal suv ta’minoti tizimiga noqonuniy ulangan MCHJ aniqlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi. 

Ma’lum qilinishicha, holat Bosh prokuratura huzuridagi departamentning Angren shahar bo‘limi tomonidan “Toshkent suv ta’minoti” MCHJ shahar filiali xodimlari bilan hamkorlikda o‘tkazilgan tergovga qadar tekshiruvda aniqlangan. “Ch.S.” MCHJ mas’ul shaxslari markazlashtirilgan kommunal suv ta’minoti tizimiga suvni hisobga olish uskunalarini o‘rnatmasdan o‘zboshimchalik bilan ulanib, foydalanib kelganligi natijasida “Toshkent suv ta’minoti” MCHJ manfaatlariga jami 831,6 million so‘m zarar yetkazgan.

Mazkur holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilib, tergov harakatlari o‘tkazilmoqda.