Глобал экологик фонд (ГЭФ) Марказий Осиё мамлакатлари ўртасида экотизимларни тиклаш соҳасида ҳамкорликни мустаҳкамлаш учун 26 млн доллар грант ажратади. Бу ҳақда Эковазирлик матбуот хизмати хабар бермоқда.
Маълум қилинишича, 13 февраль куни экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов ва Глобал экологик фонд (ГЭФ) раҳбари Карлос Родригес ўртасида учрашув бўлиб ўтган.
“Марказий Осиё вазирлари экотизимларни тиклаш ва иқлим ўзгаришининг олдини олиш бўйича минтақавий ҳамкорликка тайёр. Бешта давлат бир-бирига боғланган, Марказий Осиё минтақаси эса бир экотизимдир”, — деган вазир.
Фонд кенгашининг 66-йиғилиши доирасида Экотизимни тиклаш, табиий ресурсларни бошқаришни яхшилаш ва мустаҳкамликни ошириш учун Марказий Осиё сув ва қуруқлик алоқалари (CАWLN) минтақавий дастурининг 5 та лойиҳасига 26 млн доллар ажратилган. Умумий қиймати 18,6 млн доллар бўлган бешта лойиҳадан тўрттаси Ўзбекистон иштирокида БМТнинг Озиқ-овқат ва қишлоқ хўжалиги (БМТ FAO) кўмагида амалга оширилади.
Бу лойиҳаларга Марказий Осиёнинг заиф экотизимларида ерларни тиклаш, Амударё, Зарафшон, Панж, Сирдарё ва Норин дарёлари ҳавзаларида сув ресурсларини комплекс бошқаришни кучайтириш, экотизимлар ва биохилма-хилликни сақлашни яхшилаш учун табиий ресурсларни комплекс бошқариш кабилар киради.
Музокаралар чоғида 2025 йилда Ўзбекистонда ГЭФ ассамблеясини ўтказиш, Очиқ денгиз бўйича халқаро шартнома, Central Asian Green University билан ҳамкорлик қилиш ва бошқа масалалар муҳокама қилинган.
Изоҳ (0)