O‘zbekistonda qurilish maydoniga va unga kirib-chiqish yo‘llariga suv sepadigan osma yomg‘irlatgichlar o‘rnatiladi. Bu haqda 6-fevral kuni bo‘lib o‘tgan Senatning Orolbo‘yi mintaqasini rivojlantirish masalalari va ekologiya qo‘mitasining “O‘zbekiston – 2030” strategiyasini “Yoshlar va biznesni qo‘llab-quvvatlash yili”da amalga oshirishga oid davlat dasturi loyihasi muhokamasiga bag‘ishlangan yig‘ilishda taʼkidlangan.
Davlat dasturida barcha sohalar kabi, ekologiya, atrof muhitni muhofaza qilish, ekologik barqarorlikni taʼminlash, qayta tiklanuvchi energiya manbalaridan foydalanishni kengaytirish, suv resurslaridan oqilona va samarali foydalanish masalalariga alohida eʼtibor qaratilayotganligini senatorlar tomonidan taʼkidlangan.
“Yashil energiya” manbalari salmog‘ini oshirish maqsadida joriy yilda xorijiy investorlar ishtirokida Toshkent, Qashqadaryo, Buxoro, Namangan va Navoiy viloyatlarida umumiy quvvati 2 700 MVt bo‘lgan 6 ta yirik quyosh elektr stansiyalarini ishga tushirish rejalashtirilmoqda. Senatorlar bu o‘z navbatida mamlakatda energetik barqarorlikni taʼminlashda muhim omil bo‘lib xizmat qilishini alohida qayd etishdi.
Shuningdek, “Yashil” iqtisodiyotga o‘tishni taʼminlash uchun qulay sharoitlarni yanada kengaytirish maqsadida “yashil” sertifikatlar aylanmasi bozor tamoyillari asosida yo‘lga qo‘yilishi nazarda tutilmoqda. Shu bilan bir qatorda suv resurslarini tejash maqsadida yirik kanallarni betonlashtirish, suvni boshqarish tizimini tubdan isloh qilish, suv tejovchi texnologiyalarni rivojlantirish, sohaga xususiy sektor va davlat-xususiy sheriklik mexanizmlarini keng joriy etish ko‘zda tutilmoqda.
Atmosfera havosiga ko‘rsatilayotgan salbiy oqibatlarni kamaytirish, atmosfera havosi ifloslanishining oldini olish, iqtisodiyot tarmoqlarining havoga chiqariladigan zararli gazlar hajmini 1,5 foizga qisqartirish, chang bo‘ronlariga qarshi kurashish va ularning oqibatlarini yumshatish, qurilish maydoniga va unga kirib-chiqish yo‘llariga suv sepadigan osma yomg‘irlatgichni o‘rnatish majburiy etib belgilash masalalari nazarda tutilayotganligi qayd etib o‘tildi.
2024-yilda yashil bog‘lar sonini 444 taga yetkazish, yashillik darajasini 12,4 foizga olib chiqish, 112 ta yirik sanoat korxonalarining hududida va unga tutash hududlarda 2,1 million tup ko‘chatdan iborat “yashil belbog‘” lar barpo etish, Respublikada o‘rmon bilan qoplangan maydonlarni 3,65 million gektarga (8,1 foizga) yetkazish choralarini ko‘rish vazifa qilib belgilanganligi ekologik barqarorlikni taʼminlashning muhim omili bo‘lishi aytib o‘tildi.
Atrof-muhitni muhofaza qilish va suv resurslarini tejash yo‘nalishi bo‘yicha amaliy chora-tadbirlar bilan bir qatorda sohada qator normativ-huquqiy hujjatlarni ishlab chiqish masalalari ham davlat dasturidan o‘rin olgan. Orolbo‘yi mintaqasida ekologik vaziyatni barqarorlashtirish, Orol dengizi qurishi natijasida yuzaga kelgan ekologik muammolarning salbiy taʼsirini yumshatishga qaratilgan vazifalar doirasida dengizning qurigan tubida qo‘shimcha 100 ming gektar yashil maydonlarni barpo etish, iqlim o‘zgarishi salbiy taʼsirining oldini olish, biologik xilma-xillik ishonchli saqlanishini taʼminlashda muhim o‘rin tutishi taʼkidlandi.
Senatorlar Davlat dasturi loyihasiga bir qator taklif va tavsiyalar bildirdi.
Izoh (0)