Eron tomonidan qo‘llab-quvvatlangan guruhlar tomonidan Iordaniyadagi AQSH harbiy bazasiga hujum uyushtirilishi va oqibatda uch nafar amerikalik askarning o‘ldirilishi AQSH prezidenti Jo Baydenga nisbatan bosimni oshirib yubordi. Siyosatchilar prezidentdan Eronga to‘g‘ridan to‘g‘ri zarba berishni talab qilmoqda.
Reuters agentligining yozishicha, Bayden katta urush boshlanishidan qo‘rqib, bu qadamni qo‘yishni istamayapti.
AQSH prezidenti amerikalik askarlarning o‘ldirilishiga javoban faqat Eron chegaralari tashqarisidagi guruhlarga zarba bermoqchi.
Respublikachilar partiyasi vakillari Baydenni amerikalik harbiylarni javob berishga qodir bo‘lmagan, “faqat bir joyda o‘tiradigan o‘rdak”ka aylantirib qo‘yishda aybladi.
Endi ular prezidentdan Eronga zarba berishni talab qilmoqda. “Bu hujumlarga yagona javob Eron terrorchi kuchlariga ham Eronda, ham butun Yaqin Sharqda halokatli harbiy javob bo‘lishi kerak”, dedi respublikachi senator Tom Kotton.
Demokratlar esa Baydenning G‘azo sektoridagi Isroil va HAMAS o‘rtasidagi mojaroni to‘xtatish bo‘yicha strategiyasi barbod bo‘layotganidan ochiqchasiga xavotir bildirdi.
“Vaziyat nazoratdan chiqib ketmoqda. Mojaro mintaqaviy urushga aylana boshladi, afsuski, AQSH va bizning qo‘shinlarimiz xavf ostida”, — dedi Demokratlar partiyasi vakili Barbara Li.
Izoh (0)