Agar Budapesht shu hafta bo‘lib o‘tadigan YI sammitida Kiyevga yangi yordam paketini bloklasa, Yevropa Ittifoqi Vengriya iqtisodiyotida muammolarni yuzaga keltiradi, deb yozadi Financial Times.
Nashrning yozishicha, Vengriyaning iqtisodiy muammolaridan, jumladan, hukumat kamomadi, yuqori inflyatsiya, zaif valyuta va Yevropa Ittifoqidagi eng yuqori darajadagi qarz ajratish bo‘yicha strategiyani belgilab beradigan maxfiy reja tuzilgan. Vengriya Ukrainaga mablag‘ ajratish qaroriga veto qo‘ysa, bu reja ishga tushiriladi.
Hujjatda taʼkidlanishicha, “1-fevraldagi sammitda kelishuv bo‘lmasa, boshqa davlat va hukumat rahbarlari Vengriya bosh vazirining konstruktiv bo‘lmagan xatti-harakatlari sababli YI tomonidan bu mamlakatga boshqa pul berilmasligini ochiq eʼlon qiladi”.
Vengriyaning Yevropa Ittifoqi ishlari bo‘yicha vaziri Yanosh Boka nashrga bergan intervyusida uning mamlakati bosimlardan qo‘rqmasligini aytgan.
Uning so‘zlariga ko‘ra, “Vengriya Ukrainani qo‘llab-quvvatlash va YI mablag‘larini olish o‘rtasida bog‘liqlik ko‘rmaydi va boshqa tomonlarning bunga urinishlarini ham rad etadi”.
O‘tgan yilning dekabr oyida bo‘lib o‘tgan sammitda Yevropa Ittifoqi yetakchilari Ukrainaga keyingi moliyaviy yordam masalasida konsensusga erisha olmagan edi. Vengriya bosh vaziri Viktor Orban sammitda ushbu maqsadlar uchun mablag‘ ajratilishiga to‘sqinlik qilganini tasdiqladi.
“Kerakli tayyorgarlikdan so‘ng, 2024-yil boshida sammitda bu masalaga qaytamiz”, — deb yozgandi u X ijtimoiy tarmog‘ida.
Izoh (0)