AQSH davlat kotibining Yevropa va Yevrosiyo masalalari bo‘yicha yordamchisi Jeyms O’Brayenning aytishicha, 2024-yil oxirigacha Ukraina qurollari yanada kuchliroq bo‘ladi va Ukraina Qurolli kuchlari jangovar hududlarda yanada qulayroq pozitsiyalarni egallaydi. U Ukraina armiyasi 2024-yilda hujumga o‘tishi mumkinligini taxmin qildi, deb xabar beradi “Amerika ovozi”.
O’Brayenning so‘zlariga ko‘ra, joriy yil uchun jangovar strategiya “2023-yilda amalga oshirilgan ishlar”ga asoslangan. Uning so‘zlariga ko‘ra, Ukrainaning asosiy maqsadlari “Qora dengizga chiqish va Rossiyaning Qrimdagi imkoniyatlarini beqarorlashtirish” bo‘ladi.
Davlat kotibi yordamchisining qo‘shimcha qilishicha, AQSH rasmiylari agar mamlakat Kongressi Ukrainaga harbiy yordam paketi ajratishni maʼqullamasa, vaziyatdan chiqish uchun muqobil variantlar ko‘rib chiqmoqda. O’Brayen bu haqida batafsilroq gapirishdan bosh tortdi.
Dekabr oyi oxirida Ukraina prezidenti Vladimir Zelenskiy mamlakat 2024-yilda harbiy ishlab chiqarishni ko‘paytirishni rejalashtirayotganini ma’lum qilgandi. Yanvar oyida Bloomberg Vashington Kiyevdan aniqroq harbiy harakatlar rejasini ko‘rmoqchi ekanligini yozgan edi. AQSH rasmiylariga bu “o‘z harakatlarini yaxshiroq muvofiqlashtirish” uchun kerak ekani ta’kidlangan.
27-dekabr kuni Qo‘shma Shtatlar 2023-yilda Ukrainaga 250 million dollar miqdoridagi so‘nggi harbiy yordam paketi o‘tkazilishini e’lon qilgandi.
Izoh (0)