22-yanvar kuni AQSHning Illinoys shtatida ikkita turar joy binosiga uyushtirilgan hujum oqibatida yetti kishi halok bo‘ldi. Ommaviy qotillikda gumon qilingan shaxs o‘z joniga qasd qildi.
ABC News telekanali xabar berishicha, mahalliy politsiya ushbu hodisani so‘nggi o‘ttiz yillikdagi eng shafqatsiz jinoyatlardan biri deb atadi. Gumonlanuvchi 23 yoshli yigit o‘z joniga qasd qilgan.
Joliyet shahridagi ikkita uyda o‘q tekkan yetti kishining jasadi topildi. Ikkala uyning egalari bir oila a’zosi bo‘lgan. Gumonlanuvchi qidiruvga berilgan. 22-yanvar kuni kechki payt politsiya Texasda qotillikda gumon qilinayotgan shaxsning iziga tushdi. Texas politsiyasi bilan qisqa muddatli “to‘qnashuv”dan so‘ng erkak o‘z joniga qasd qildi.
Joliyet politsiyasi boshlig‘i Bill Evansning aytishicha, qirg‘in uning faoliyatidagi eng dahshatli jinoyat sanaladi.
“29 yildan beri politsiyada ishlayman. Bu men ko‘rgan eng yomon jinoyat joyi bo‘lsa kerak”, — deydi Evans.
Politsiya ma’lumotlariga ko‘ra, qotil o‘z qurbonlari bilan tanish bo‘lgan. Jinoyat sodir etilgunga qadar u yana ikkita hujumda gumonlanib qidiruvga berilgan edi. 21-yanvar kuni gumonlanuvchi yana ikki erkakni o‘qotar qurol bilan yaralagan, ulardan biri keyinroq kasalxonada vafot etgan.
Illinoys politsiyasi qotilning maqsadini hali aniqlamadi. Taxminlarga ko‘ra, uning o‘z qurbonlari bilan shaxsiy hisob-kitoblari bo‘lgan bo‘lishi mumkin.
Izoh (0)