Samarqand tumanida qurilish obyektida qorovul bo‘lib ishlovchi erkakni o‘ldirgan 34 yoshli yigitga sud hukmi o‘qildi, deb xabar beradi Oliy sud matbuot kotibi.
Ma’lumotlarga ko‘ra, 2023-yil iyul oyida Samarqand tumanida joylashgan qurilish obyektida qorovul bo‘lib ishlab kelgan erkakning oldiga 1989-yilda tug‘ilgan erkak kelgan va ular birga spirtli ichimlik isteʼmol qilgan.
Shundan so‘ng ular o‘rtasida kelishmovchilik yuzaga kelgan. Oqibatda mast holatda bo‘lgan erkak qorovulni kaltaklab, o‘ldirib qo‘ygan va voqea joyidan ketib qolgan.
Qorovulning jasadi voqea joyida uch kun qolib ketgan. Uni 2023-yil 15-iyul kuni qurilish obyekti atrofida o‘ynab yurgan bolalar ko‘rib qolgan va bu haqda ichki ishlarga xabar berilgan. Tezkor surishtiruvlar davomida marhum qashqadaryolik ekani va qurilish obyektida ishlab yurgani aniqlangan. Shuningdek, uni o‘ldirgan shaxs kuzatuv kameralariga tushib qolgan va 16-iyul kuni ushlangan.
Qayd etilishicha, holat yuzasidan bo‘lib o‘tgan sudda gumondor Jinoyat kodeksining 97-moddasi (qasddan odam o‘ldirish) 2-qismi “v” va “j” bandlari bilan aybdor deb topilgan. Unga 15 yil muddatga ozodlikdan mahrum qilish jazosi tayinlangan.
Avvalroq Namangan viloyatining Mingbuloq tumanida 5 yoshli o‘g‘lini o‘ldirmoqchi bo‘lgan erkak qo‘lga olingani, Qashqadaryoda “Yor-yor” ko‘rsatuvi orqali ayol bilan tanishgan erkak uni o‘ldirib qo‘ygani to‘g‘risida xabar berilgandi.
Izoh (0)