Jizzax viloyati G‘allaorol tumanida bosqinchilik jinoyatini sodir etgan shaxslar ushlangan. Bu haqda IIV huzuridagi Tergov departamenti xabar bermoqda.
Ma’lum qilinishicha, 2023-yil 18-noyabr kuniga o‘tar kechasi uch nafar noma’lum shaxs G‘allaorol tumanining “Oqtom” mahallasida yashovchi 70 yoshli fuqaroning xonadoniga kirgan. Uydan moddiy qimmatliklar topa olmagan jinoyatchilar oila boshlig‘i va uning turmush o‘rtog‘iga zo‘rlik ishlatgan. So‘ng erkak va ayolga hayot uchun xavfli bo‘lgan og‘ir tan jarohatlari yetkazib, voqea joyidan yashiringan.
Oqibatda 70 yoshli erkak va uning xotini G‘allaorol tumani markaziy shifoxonasining jonlantirish bo‘limiga yotqizilgan. Ko‘rsatilgan tibbiy muolajalarga qaramay, erkak olti kundan so‘ng vafot etgan.
Holat yuzasidan Jizzax viloyat IIB huzuridagi Tergov boshqarmasi tomonidan jinoyat ishi qo‘zg‘atilgan. Olib borilgan tezkor qidiruv harakatlari davomida bosqinchilik qilgan shaxslar aniqlangan.
Xususan, Samarqand viloyati Past Darg‘om tumani Sariboshi va Po‘latchi mahallalarida yashovchi 1991, 1994 va 1998-yillarda tug‘ilgan yigitlar hamda jabrlanuvchi bilan bitta mahallada yashovchi 36 yoshli shaxs protsessual tarzda ushlangan.
Gumon qilinuvchilar o‘z qilmishlarini yashirish maqsadida o‘zlari foydalangan niqoblar, qo‘lqoplar va temir bo‘lagini Past Darg‘om tumani “Do‘rmonsoy” mahallasidan oqib o‘tuvchi kanalga tashlab yuborgan. IIB xodimlari tomonidan ashyoviy dalillar topilgan va hujjatlashtirib olingan.
Holat yuzasidan gumonlanuvchi to‘rt nafar shaxsga Jinoyat kodeksining 164-moddasi (bosqinchilik) 3-qismi “v”, “g” bandlari bilan ayblov e’lon qilingan. Hozirda mazkur jinoyat ishi yuzasidan dastlabki tergov harakatlari olib borilmoqda.
Bundan oldin Namanganda ayol erining e’tiborini tortish uchun o‘z uyida bosqinchilik qilgani, Sirdaryoda uyga o‘g‘rilikka tushib, 14 yoshli qizni o‘ldirgan shaxs 23 yilga ozodlikdan mahrum etilgani to‘g‘risida xabar berilgandi.
Izoh (0)