Самарқанд туманида қурилиш объектида қоровул бўлиб ишловчи эркакни ўлдирган 34 ёшли йигитга суд ҳукми ўқилди, деб хабар беради Олий суд матбуот котиби.
Маълумотларга кўра, 2023 йил июль ойида Самарқанд туманида жойлашган қурилиш объектида қоровул бўлиб ишлаб келган эркакнинг олдига 1989 йилда туғилган эркак келган ва улар бирга спиртли ичимлик истеъмол қилган.
Шундан сўнг улар ўртасида келишмовчилик юзага келган. Оқибатда маст ҳолатда бўлган эркак қоровулни калтаклаб, ўлдириб қўйган ва воқеа жойидан кетиб қолган.
Қоровулнинг жасади воқеа жойида уч кун қолиб кетган. Уни 2023 йил 15 июль куни қурилиш объекти атрофида ўйнаб юрган болалар кўриб қолган ва бу ҳақда ички ишларга хабар берилган. Тезкор суриштирувлар давомида марҳум қашқадарёлик экани ва қурилиш объектида ишлаб юргани аниқланган. Шунингдек, уни ўлдирган шахс кузатув камераларига тушиб қолган ва 16 июль куни ушланган.
Қайд этилишича, ҳолат юзасидан бўлиб ўтган судда гумондор Жиноят кодексининг 97-моддаси (қасддан одам ўлдириш) 2-қисми “в” ва “ж” бандлари билан айбдор деб топилган. Унга 15 йил муддатга озодликдан маҳрум қилиш жазоси тайинланган.
Аввалроқ Наманган вилоятининг Мингбулоқ туманида 5 ёшли ўғлини ўлдирмоқчи бўлган эркак қўлга олингани, Қашқадарёда “Ёр-ёр” кўрсатуви орқали аёл билан танишган эркак уни ўлдириб қўйгани тўғрисида хабар берилганди.
Изоҳ (0)