Toshkentda 31 yoshli erkak qo‘lida guldasta bilan yalang‘och holda ko‘cha aylangani haqida xabar berilgandi. Bosh prokuraturaning “Daryo”ga maʼlum qilishicha, mazkur erkak odam o‘ldirib qo‘ygan.
4-avgust kuni Yunusobod tumani, 11-mavze hududida, 1992-yilda tug‘ilgan T.A. qo‘lida guldasta bilan yalang‘och holda jamoat joyida harakatlanib, bu xatti-harakati bilan fuqarolar noroziligini keltirib chiqargan.
Holat yuzasidan Yunusobod tumani IIO FMB tomonidan o‘tkazilgan tekshiruv jarayonida fuqaro T.A. Toshkent shahar Ruhiy-asab kasalliklar guruhi shifokori tomonidan ko‘rikdan o‘tkazilgan. Ko‘rik natijasida T.A.ning ruhiyatida buzilish aniqlangani sababli fuqaro shahar ruhiy-asab kasalliklar shifoxonasiga yuborilgan.
Fuqaro shifoxonadan qochib ketib, Namangandagi tovuq fabrikalaridan biriga borib, u yerda yashab, ishlay boshlagan. Fabrika qorovuli bilan gap talashib, erkak qorovulni pichoqlab o‘ldirgan.
Ruhiy-asab kasalliklar shifoxonasi tomonidan unga “aralash dissosiativ buzilish” tashxisi qo‘yilib, jinoyatni aqli noraso holatida sodir etgan deb topilgan va majburiy davolanishga muhtojligi hisobga olinib, u majburiy davolanishga yuborilgan. Holat yuzasidan ish noyabr oyida sudga yuborilgan.
Izoh (0)