Qashqadaryo viloyati G‘uzor tumanida o‘zi bilan uchrashib yurgan ayolni o‘ldirgan jondorlik 36 yoshli erkakka sud hukmi o‘qildi. Bu haqda “Bir jinoyat izidan” ko‘rsatuvida ma’lum qilindi.
Qayd etilishicha, 2023-yilning 28-fevral kuni G‘uzor tumani IIBga tumanning “Mirishkor” qishlog‘ida yashovchi, 35 yoshli S.M. singlisining uyida o‘ldirib ketilgani haqida xabar kelib tushgan. Tezkor tergov guruhi zudlik bilan voqea joyiga yetib borgan.
Marhumaning jasadi hovlidagi chuqurligi 2,5 metrlik quduqdan chiqarib olingan. Holat yuzasidan Jinoyat kodeksining 97-moddasi (qasddan odam o‘ldirish) 1-qismi bilan jinoyat ishi qo‘zg‘atilib, tergov harakatlari boshlangan.
Tergov jarayonida marhuma keyingi paytlarda Buxoro viloyatining Jondor tumani, “Demun” mahallasida yashovchi 36 yoshli S.E. bilan uchrashib yurgani aniqlangan. 2021-yilda turmush o‘rtog‘idan ajrashgan S.M. oila qurish maqsadida “Zo‘rTV” telekanalida efirga uzatiladigan “Yor-yor” ko‘rsatuvida chiqish qilgan. 2021-yilning dekabr oyida unga Jondor tumanida yashovchi S.E.dan qo‘ng‘iroq bo‘lgan va ular o‘zaro tanishib olishgan.
G‘uzorga tez-tez qatnashni boshlagan erkak, S.M. bilan uning singlisining uyida uchrashib yurgan. Ammo to‘ydan darak bo‘lmagan. Oxir-oqibat ayol va erkak o‘rtasida janjal kelib chiqqan: ayolga tan jarohati yetkazib, hushsiz holga keltirgan. So‘ngra esa uni o‘ldi degan o‘yda hovlidagi quduqqa tashlab yuborib, o‘limiga sababchi bo‘lgan.
Jinoyat ishlari bo‘yicha G‘uzor tuman sudining hukmi bilan S.E.ga 13 yil ozodlikdan mahrum qilish jazosi tayinlangan.
Er-xotin o‘rtasidagi qotillik holatlari
Avvalroq Sirdaryo viloyati Shirin shahrida xotinini farzandi yonida pichoqlab o‘ldirgan erkakka sud hukmi o‘qilgandi. Undan oldin esa Sankt-Peterburgda o‘zbekistonlik erkak 19 yoshli xotinini bo‘g‘ib o‘ldirgani, Jizzaxda o‘g‘li va ayolini o‘ldirib, yoqib yuborgan 23 yoshli yigit umrbodga qamalgani, Jizzaxda janjal oqibatida xotinini vannada pichoqlab o‘ldirgan erkakka hukm o‘qilgani to‘g‘risida xabar berilgandi.
Izoh (0)