Bugungi kunda respublika bo‘yicha 2 131 ta masjid faoliyat yuritmoqda. Bu haqda AOKAda o‘tkazilgan brifingda Din ishlari bo‘yicha qo‘mita axborot xizmati rahbari Ilhom Maʼrupov maʼlum qildi.
Ilhom Maʼrupovning aytishicha, 2023-yilda 13 ta yangi masjid davlat ro‘yxatidan o‘tkazilgan, 82 ta masjidda tubdan qayta qurish hamda 43 ta masjidda taʼmirlash ishlari yakunlangan.
“Ayni paytda respublikamizda 197 ta noislomiy diniy tashkilot faoliyat yuritmoqda. 2023-yilda Angren shahrida katolik cherkovi davlat ro‘yxatidan o‘tkazildi. Konfessiyalar vakillarining 50 dan ortiq respublika va xalqaro tadbirlarda ishtiroki taʼminlandi. Shuningdek, ularga 14 ta diniy bayramlarini o‘tkazishda amaliy yordam ko‘rsatildi”, — dedi tashkilot vakili.
Qo‘shimcha qilinishicha, o‘tgan yili o‘zbekistonliklarning 15 ming 150 nafari haj, 43 mingdan ortiq ziyoratchi umra amalini ado etgan.
Avvalroq 2023-yilning avgust oyida mamlakatda jami 2125 ta masjid va 197 ta noislomiy diniy tashkilot faoliyat olib borayotgani xabar qilingandi.
Izoh (0)