AQSH Xalqaro taraqqiyot agentligi (USAID) Toshkentdagi “Energiya” muvofiqlashtirish va dispetcherlik markaziga 10-yanvar kuni energetika sektorini boshqarish bo‘yicha 1,4 million dollarlik zamonaviy asbob-uskunalar va dasturiy ta’minotni topshirdi. Bu haqda “Daryo”ga USAID matbuot xizmati xabar berdi.
Rasmiy topshirish marosimida “Energiya” dispetcherlariga mintaqadagi energiya rejimini saqlash uchun dolzarb ma’lumotlarni namoyish qilish imkonini beradigan ilg‘or texnologiyalar namoyish etildi.
Ushbu sarmoyalar tarmoq barqarorligini ta’minlash va mintaqaviy energiya savdosi imkoniyatlarini kengaytirish uchun Markaziy Osiyoning elektr energiyasi oqimini boshqarish hamda nazorat qilish qobiliyatini oshiradi. Shuningdek, u qayta tiklanadigan energiya manbalarining jadal integratsiyasi hamda Markaziy Osiyoda elektr energiyasi va quvvatlar bozorini joriy etish munosabati bilan ortib borayotgan muammolarga duch kelayotgan mintaqaviy tizim operatori sifatida “Energiya” MDM ishini modernizatsiya qiladi.
Marosimda ishtirok etgan AQSHning O‘zbekistondagi elchisi Jonatan Henik o‘z nutqida O‘zbekistonning mintaqa energetika sohasidagi muhim rolini alohida ta’kidladi.
“O‘zbekiston markaziy geografik joylashuvi, boy energiya resurslari va asosiy infratuzilmasi tufayli mintaqada muhim rol o‘ynaydi. Markaziy Osiyoning energetika tizimi kengayib, yanada murakkablashib borar ekan, energetika sohasini rivojlantirishni rejalashtirish uchun innovatsion yechimlar zarurdir. Biz birgalikda qayta tiklanuvchi energiya manbalari tizimiga o‘tishning murakkab muammolariga javob berish uchun barqaror kelajak uchun poydevor qurmoqdamiz”, — dedi u.
Uskunaning o‘rnatilishi AQSH va Markaziy Osiyoning barcha beshta davlati — Qozog‘iston, Qirg‘iziston, Tojikiston, Turkmaniston va O‘zbekiston prezidentlarining qo‘shma farmonida bayon etilgan yuqori darajadagi ustuvor vazifalarga muvofiq holda O‘zbekiston va butun mintaqada yanada mustahkam va samarali energetika landshaftiga erishish yo‘lidagi muhim qadamdir. Ularning qo‘shma qarorida ta’kidlanganidek, USAID Power Central Asia, AQSH va Markaziy Osiyo davlatlari kabi C5+1 dasturlari orqali mintaqaviy toza energiya savdosining iqtisodiy foydalari va toza iqtisodiyot kelajagi ochiladi.
Izoh (0)