O‘zbekiston musulmonlari idorasi raisi, muftiy shayx Nuriddin Xoliqnazarov ilm olish, unga rag‘bat uyg‘otish va sharoit yaratishning ham savobi kattaligi haqida gapirdi.
“Qur’oni Karimda birinchi kelgan oyat ilm bo‘ldi. Suralarni o‘rganib chiqsangiz, juda ko‘p joyda Alloh ilmga targ‘ib qilgan… Ilm olishlik har bir musulmon — erkak va ayolga farz deganlar… Ilm, olimlik — mana bu Islomning eng birinchi shioriga aylandi. Chunki ilmli odam Allohni taniydi, ma’rifatli odam yurtini, Vatanini sevadi, boshqalarga yaxshilik qiladi. Dinimiz jaholat emas, ma’rifat ustiga qurilgan”, — deydi muftiy.
Shu bilan birga, shayx Nuriddin Xoliqnazarov mamlakatda maktablarga ehtiyoj kattaligi haqida gapirdi.
“Masjid qurishlik yaxshi, biz mana bu yerga masjid quring, degan joyga qurib bersa — savob. Lekin bugun maktabga juda katta ehtiyojimiz tushyapti. Chunki maktab bizning kelajagimiz”, — deya ta’kidlaydi muftiy.
Qayd etilishicha, O‘zbekistonda bir yilda salkam 1 million bola dunyoga kelmoqda. Demak, har yili shuncha bola maktabga boradi.
“Tasavvur qiling, har yili 1 million bola uchun o‘quv sharoitini yaratish kerak. Davlatimiz rahbari, hukumatimizga ming rahmat, maktablar qilib beryapti… Lekin yurtning fidoyi insonlari, boy-badavlat kishilar shu yurtdan mablag‘ topyapsiz, kelajagimiz, bolalarimiz uchun maktab qurib bering. Bog‘chalar, shifoxona, yo‘l, ko‘prik quring. Mana bu ham juda katta savob.
Masjid qurish degani bu musobaqalashish degani emas, bu ibodatxona. Shunaqa bir loyihalar bilan kelishyaptiki, hayron qolasiz. Bitta minora qurish uchun salkam 3 milliard so‘m ketar ekan. Shu bitta minorani qursak, xalqimiz ma’naviyatiga, yoshlarimiz ilmiga, kambag‘al bo‘lib qolgan kimsalarga nima yordam beradi, degan savolni beryapman. Yo‘q, hech narsa qilmaydi bitta minora. Bu isrof emasmi?! Mana shu 3 milliard pulga bitta chiroyli maktab tushar ekan, shu pul qancha bemorga yordam bersa bo‘ladi”, — deydi Musulmonlar idorasi raisi.
Avvalroq muftiy Nuriddin Xoliqnazarov abituriyentlarning 40 foizidan ortig‘i 56,7 ball ham ololmaganini musibat deb atagandi. Nuriddin Xoliqnazarov turli mayda-chuyda masalalarda tortishishni to‘xtatib, soqolning uzun-kaltaligi-yu, kiyimni qanday kiyishni muhokama qilishni chekkaga qo‘yib, ilm-maʼrifat bilan shug‘ullanilmasa, xalq baxtli-saodatli bo‘lishi qiyin masala ekanini qayd etgan.
Izoh (0)