O‘zbekistonda mutasaddi vazirlik va idoralar hamkorligida 2023-yilning birinchi yarmida 15 150 nafar ziyoratchi haj amalini, 34 mingdan ortiq ziyoratchi umra amalini ado etdi. Bu haqda Din ishlari bo‘yicha qo‘mita axborot xizmati rahbari Ilhom Ma’rupov ma’lum qildi.
Uning bildirishicha, aholi ehtiyojidan kelib chiqib, hududlarda 6 ta yangi diniy tashkilot o‘z faoliyatini boshladi. Shuningdek, 7 ta diniy tashkilotda tubdan qayta qurish, 18 tasida ta’mirlash ishlari yakunlandi, 250 ta binoda qurilish-ta’mirlash ishlari davom etmoqda. Ma’lumot uchun: Bugungi kunda Respublika bo‘yicha jami 2125 ta masjid va 197 ta noislomiy diniy tashkilot faoliyat olib bormoqda.
Ushbu davr mobaynida qo‘mitaga jismoniy va yuridik shaxslardan 1 277 ta murojaat kelib tushgan. O‘tgan yilning shu davriga nisbatan murojaatlar soni 250 taga kamaygan.
Ularda quyidagi masalalar ko‘tarilgan:
- haj va umra ziyoratlariga borish masalasida – 764 ta;
- masjidlarni davlat ro‘yxatiga olish yuzasidan – 198 ta;
- dinshunoslik ekspertizasi o‘tkazish xususida – 110 ta;
- noislomiy konfessiyalarni davlat ro‘yxatiga olish bilan bog‘liq – 22 ta;
- diniy ta’lim olish bilan bog‘liq – 15 ta.
Qo‘mitaga kelib tushgan murojaatlarning 856 tasiga huquqiy ma’lumot berilgan, 280 tasi ijobiy hal qilingan, 83 tasi (diniy tashkilotni davlat ro‘yxatidan o‘tkazish uchun hujjatlarda ko‘rsatilgan kamchiliklar sabab) rad etilgan. 34 ta murojaat tegishliligi bo‘yicha vakolatli davlat organlariga yo‘naltirilgan, 24 tasi bo‘yicha o‘rganish jarayoni davom etmoqda.
Izoh (0)