O‘zbekiston prezidentining 1992-yil 8-yanvardagi “O‘zbekiston Respublikasi prokuratura organlari to‘g‘risida”gi farmoni qabul qilingan bo‘lib, unga ko‘ra sobiq Ittifoq qaramog‘idagi O‘zbekiston SSR prokuraturasi mustaqil O‘zbekiston prokuraturasiga aylantirilgandi. Shundan beri O‘zbekistonda 8-yanvar Prokuratura xodimlari kuni sifatida nishonlab kelinadi.
“Daryo” mazkur sana munosabati bilan O‘zbekistonda faoliyat yuritayotgan hokimlar orasida prokuratura tizimidan chiqqan amaldorlarni jamladi. Aniqlanishicha, mamlakatda faoliyat yuritayotgan viloyat, tuman va shahar hokimlarining 20 nafari prokuratura tizimidan chiqqan rahbarlar hisoblanadi.
Ma’lum bo‘lishicha, O‘zbekistonda faoliyat yuritayotgan amaldagi viloyat hokimlari orasida Surxondaryo viloyati hokimi Ulug‘bek Qosimov, Qashqadaryo viloyati hokimi Murodjon Azimov hamda Toshkent shahri hokimi Shavkat Umrzoqov prokuratura tizimidan chiqqan.
Ayni kunda poytaxtga rahbarlik qilayotgan Shavkat Umrzoqov prokuratura tizimidagi faoliyatini 2011-yil boshlagan bo‘lib, shu yildan 2013-yilning sentyabrigacha Toshkent viloyati prokuraturasining iqtisodiy jinoyatlarga va korrupsiyaga qarshi kurashish boshqarmasi boshlig‘i sifatida ishlagan. 2018-yilning mart-iyun oylarida esa O‘zbekiston Respublikasi bosh prokurori o‘rinbosari sifatida faoliyat yuritgan.
Surxondaryo viloyati hokimi Ulug‘bek Qosimov esa hokimlikka qadar Toshkent shahar prokurori lavozimida faoliyat yuritgan. Qashqadaryo viloyati hokimi, general-mayor Murodjon Azimov ham 2016-yildan 2018-yilning fevraliga qadar O‘zbekiston bosh prokurorining birinchi o‘rinbosari lavozimida ishlagan.
O‘zbekistonda shuningdek, mavjud 200 nafar shahar va tuman hokimlari orasida ham prokuraturadan chiqqan amaldorlar ko‘p.
Jumladan Qashqadaryo viloyatining G‘uzor va Shahrisabz tumani hokimlari ham prokuraturadan chiqqan rahbarlar hisoblanadi. Ayni paytda G‘uzor hokimi sifatida ishlab kelayotgan Bekzod Suyunov 2018-yilning avgust oyidan 2020-yilga qadar shu tuman prokurori lavozimida ishlagan.
Surxondaryo viloyatining Sariosiyo va Bandixon tumani hokimlari — Abduqodir Donayev hamda Abdumalik Allamuradovlar ham prokuratura “nonini yegan” rahbarlar hisoblanadi. Sariosiyo hokimi sifatida ishlab kelayotgan Abduqodir Donayev 2005—2022-yillarda prokuratura organlarida turli lavozimlarda, 2022-yildan hokimlikka qadar esa Toshkent shahrining Yashnobod tumani prokurori lavozimida ishlagan.
-UDG0HE53.jpg)
Toshkent viloyatidagi mavjud 22 nafar hokimlardan Qibray tumani hokimi Muzaffar Rashidov Toshkent viloyatidagi tumanga rahbarligidan oldin Ohangaron tumani prokurori lavozimida ishlagan. Toshkent shahridagi 12 ta tumanda rahbarlik qilayotgan hokimlarning ikki nafari ham aynan prokuratura tizimidan chiqqan. Poytaxt shaharning yagona ayol hokimi bo‘lmish Nilufar Allabergenova Yakkasaroy tumani rahbarligiga o‘tishidan avval aynan shu tuman prokurori sifatida ish olib borgan.
Allabergenova xonim 1995—2023-yillarda prokuraturada turli lavozimlarda faoliyat yuritgan.
Yunusobod tumani hokimi Bahodir Abduvaliyev ham hokimlikka kirishgunga qadar — 2019-yilning 2022-yilning yanvar oyigacha Toshkent shahar prokurori o‘rinbosari lavozimida ishlagan.
Qolaversa, O‘zbekistondagi hokimlardan Andijon viloyatining Ulug‘nor tumani hokimi Muhammadislomiddin Ahmadjonov, Jizzax viloyatining Paxtakor va Arnasoy hokimlari, Navoiy viloyatining Konimex tumani hokimi, Xorazm viloyatining Yangibozor va Urganch tumani hokimlari, Samarqand viloyatining Bulung‘ur va Samarqand, Qoraqalpog‘istonning Xo‘jayli tumani hokimi, Farg‘ona viloyatining Oltiariq tumani hokimi Shamsiddin Turdaliyevlar ham prokuratura tizimidan chiqqan amaldorlar hisoblanadi.
Izoh (0)