Qarshi tumani hokimi Zoir Aliqulov ijtimoiy soha obyektlarini ko‘zdan kechirib, binolarning sovuq kunlarga tayyorgarligini o‘rgandi. Ko‘zga tashlangan kamchiliklar bo‘yicha mas’ullarga tushuntirish berib, xatoliklarni tuzatish uchun muddat belgilab bergan. Bu haqda “Daryo”ga tuman hokimligi axborot xizmati rahbari To‘lqin Turdiyev xabar berdi.
Mas’ulning bildirishicha, tumanda hokim topshirig‘iga ko‘ra, barcha ijtimoiy soha obyektlari — maktab, bog‘cha hamda shifoxonalarning qahraton qish sovug‘iga tayyorgarligini doimiy nazorat qilish maqsadida safarbarlik e’lon qilingan.
Tumanning “Omontepa” mahallasida joylashgan 52-sonli oilaviy poliklinikani ko‘zdan kechirgan hokim muassasaning mavsumga tayyorgarligi bilan tanishdi. O‘rganish chog‘ida tuman rahbari poliklinikaga kelgan tumandoshlarimiz bilan tibbiy xizmat ko‘rsatish sifati to‘g‘risida suhbat qurdi. Xonalar haroratining joyidaligi, tartib va ozodalikka e’tibor qaratilgani nafaqat aholini, tuman hokimini ham xursand qildi, — deydi Zoir Aliqulovning matbuot kotibi.
Tuman hokimi shu kuni maktab, bog‘cha hamda shifoxonalarda ham bo‘lib, mas’ullarga isitish qozonlarini mavsumga tayyorlash, ko‘mir yoqilg‘isini zaxira qilish va undan maqsadli foydalanish bo‘yicha qator vazifalar belgilab bergan.
Kuz-qish mavsumini betalafot o‘tkazish uchun tumanimizda muhim ishlar bajarilib, kamchiliklar uchrayotgan maktab va bog‘chalarda tezkor choralar ko‘rilmoqda. Natijada bugun tumanimizda tahsil olayotgan bolajonlarning mavsum davomida sinfxonalaridagi shart-sharoitlari belgilanganidek bo‘lib, bolajonlarning bilim olishiga barcha imkoniyatlar yaratilmoqda, — deydi tuman hokimi o‘rinbosari Behruz Murodov.
Qo‘shimcha qilinishicha, Zoir Aliqulov shu kuni tunda tuman tibbiyot birlashmasida ham bo‘lib, tez tibbiy yordam hamda reanimatsiya bo‘limlarida davolanayotgan bemorlardan hol-ahvol so‘ragan.
Favqulodda vaziyatlar bo‘limidan vakillar biriktirdik. Kunlar sovidi, nazorat susaymasin, Siz shifokorlar faqat bemorlarga vaqt ajrating, shifo topishsin. Biz esa binoning issiqligini ta’minlab beramiz, — degan shifoxona mas’ullari bilan suhbatlashgan hokim.
To‘lqin Turdiyevning aniqlik kiritishicha, tuman tibbiyot birlashmasida elektr ta’minoti uzilgan vaqtda binoni elektr bilan ta’minlaydigan maxsus 5 ta generator o‘rnatilgan bo‘lib, bino favqulodda holatlarga shay holatga keltirilgan.
Izoh (0)