Қарши тумани ҳокими Зоир Алиқулов ижтимоий соҳа объектларини кўздан кечириб, биноларнинг совуқ кунларга тайёргарлигини ўрганди. Кўзга ташланган камчиликлар бўйича масъулларга тушунтириш бериб, хатоликларни тузатиш учун муддат белгилаб берган. Бу ҳақда “Дарё”га туман ҳокимлиги ахборот хизмати раҳбари Тўлқин Турдиев хабар берди.
Масъулнинг билдиришича, туманда ҳоким топшириғига кўра, барча ижтимоий соҳа объектлари — мактаб, боғча ҳамда шифохоналарнинг қаҳратон қиш совуғига тайёргарлигини доимий назорат қилиш мақсадида сафарбарлик эълон қилинган.
Туманнинг “Омонтепа” маҳалласида жойлашган 52-сонли оилавий поликлиникани кўздан кечирган ҳоким муассасанинг мавсумга тайёргарлиги билан танишди. Ўрганиш чоғида туман раҳбари поликлиникага келган тумандошларимиз билан тиббий хизмат кўрсатиш сифати тўғрисида суҳбат қурди. Хоналар ҳароратининг жойидалиги, тартиб ва озодаликка эътибор қаратилгани нафақат аҳолини, туман ҳокимини ҳам хурсанд қилди, — дейди Зоир Алиқуловнинг матбуот котиби.
Туман ҳокими шу куни мактаб, боғча ҳамда шифохоналарда ҳам бўлиб, масъулларга иситиш қозонларини мавсумга тайёрлаш, кўмир ёқилғисини захира қилиш ва ундан мақсадли фойдаланиш бўйича қатор вазифалар белгилаб берган.
Куз-қиш мавсумини беталафот ўтказиш учун туманимизда муҳим ишлар бажарилиб, камчиликлар учраётган мактаб ва боғчаларда тезкор чоралар кўрилмоқда. Натижада бугун туманимизда таҳсил олаётган болажонларнинг мавсум давомида синфхоналаридаги шарт-шароитлари белгиланганидек бўлиб, болажонларнинг билим олишига барча имкониятлар яратилмоқда, — дейди туман ҳокими ўринбосари Беҳруз Муродов.
Қўшимча қилинишича, Зоир Алиқулов шу куни тунда туман тиббиёт бирлашмасида ҳам бўлиб, тез тиббий ёрдам ҳамда реанимация бўлимларида даволанаётган беморлардан ҳол-аҳвол сўраган.
Фавқулодда вазиятлар бўлимидан вакиллар бириктирдик. Кунлар совиди, назорат сусаймасин, Сиз шифокорлар фақат беморларга вақт ажратинг, шифо топишсин. Биз эса бинонинг иссиқлигини таъминлаб берамиз, — деган шифохона масъуллари билан суҳбатлашган ҳоким.
Тўлқин Турдиевнинг аниқлик киритишича, туман тиббиёт бирлашмасида электр таъминоти узилган вақтда бинони электр билан таъминлайдиган махсус 5 та генератор ўрнатилган бўлиб, бино фавқулодда ҳолатларга шай ҳолатга келтирилган.
Изоҳ (0)