Shavkat Mirziyoyev Misr prezidenti Abdulfattoh as-Sisiga uning ushbu lavozimga qayta saylangani munosabati bilan samimiy tabriklar va eng ezgu tilaklar izhor etilgan maktub yo‘lladi.
Tabrikda so‘nggi yillarda birgalikdagi sa’y-harakatlar, qat’iy siyosiy iroda va oliy darajadagi faol muloqotlar natijasida O‘zbekiston bilan Misr o‘rtasidagi ko‘p qirrali va uzoq muddatli aloqalar sifat jihatidan mutlaqo yangi bosqichga olib chiqilgani qayd etilgan va kelgusida yanada yuksak pog‘onaga ko‘tarilishiga ishonch bildirilgan.
Misr milliy saylov komissiyasi ketma-ket uch kun (10–12-dekabr) davomida o‘tkazilgan 2024-yilgi prezidentlik saylovlari natijalarini e’lon qildi. Prezidentlikka nomzod Abdulfattoh as-Sisi jami 39 million 702 ming 451 ovoz to‘plab, saylovda ovozlarning 89,6 foizini olgan holda g‘alaba qozondi.
Saylov jarayonida amaldagi prezidentdan tashqari uchta partiyadan nomzod ishtirok etdi, ular to‘plagan ovozlar quyidagicha:
- “Respublika xalq partiyasi” yetakchisi Hazim Umar 1,9 million ovoz (4,5 foiz);
- “Vafl” liberal partiyasi yetakchisi Abdulsanad Yamama 822,6 ming ovoz (1,9 foiz);
- “Misr sotsial-demokratik partiyasi” raisi Farid Zahron 1,7 million ovoz (4 foiz).
Hukumatning xabar berishicha, 489,3 ming ovoz yaroqsiz deb topilgan, bu umumiy ovozlarning 1,1 foizini tashkil qiladi.
As-Sisining birinchi muddati 2014-yilda Muhammad Mursiy va “Musulmon birodarlar” islomiy tashkiloti hokimiyatdan chetlatilganidan keyin boshlangan.
2018-yilda as-Sisi ikkinchi muddatga qayta saylangan. 2019-yil aprel oyida referendum bo‘lib o‘tdi, unda Misr prezidentiga yangi muddatga o‘z nomzodini qo‘yish va vakolat muddatini to‘rt yildan olti yilgacha oshirish imkoniyatini beruvchi tuzatishlar qabul qilindi.
Izoh (0)