Bugungi kunda O‘zbekistonda yoshlar, ayniqsa bolalarda miopiya (uzoqni ko‘ra olmaslik) xastaligi ko‘p uchramoqda. Bu haqda “Doktor Maqsudova klinikasi” asoschisi, shifokor Zulfiya Maqsudova maʼlum qildi.
Zulfiya Maqsudovaning aytishicha, hozirda ko‘z xastaligi bilan shikoyat qiladigan har uchinchi yoki to‘rtinchi bemorda miopiya aniqlanmoqda.
“Jahon sog‘liqni saqlash tashkiloti prognozlariga ko‘ra, 2050-yilga borib Yer yuzining yarim aholisi miopiya bilan kasallanadi. Hozirda dunyoda 30 foizgacha insonlar uzoqni ko‘ra olmaslik bilan xastalangan. Biz O‘zbekiston Oftalmologlar assosiatsiyasi bilan birgalikda Toshkent shahri Mirzo Ulug‘bek tumanining qator maktablarida bo‘lib, bolalarda bepul tekshiruvlar o‘tkazdik. Shunda iqror bo‘ldikki, bolalarimizning 30 foizi aynan miopiya bilan xastalangan ekan. Eng achinarlisi, o‘sha 30 foiz bolalarning ichida 40 foizining ota-onasi farzandining ko‘zi yaxshi ko‘rmasligini bilmaydi.
Bugungi texnik progress paytida bu juda katta muammo. Hamma bolalarning qo‘lida telefon. Eʼtibor bergan bo‘lsangiz, 6 oylik bolaning ham qo‘lida telefon bor. Kompyuterlarni-ku gapirmasa ham bo‘ladi. Bu narsa albatta, miopiyaning yanada ko‘payishiga olib keladi. Avvallari miopiyani 10-15 yoshli bolalarda aniqlagan bo‘lsak, hozir 3-4 yoshlilarida ham uchramoqda. Yaʼni u erta boshlanyapti, chunki bolalar qo‘liga gadjetlar juda erta berilyapti”, — dedi shifokor “Doktor Maqsudova klinikasi”ning yangi filiali va innovatsion linzalar ishlab chiqarish laboratoriyasi ochilishida.
Zulfiya Maqsudovaning qo‘shimcha qilishicha, dunyoda uzoqni ko‘ra olmaslikni davolash bo‘yicha faol ilmiy izlanishlar olib borilyapti.
“Masalan, hozir shunday linzalar ishlab chiqilmoqdaki, ularni kechasi uxlashdan oldin ko‘zlarga qo‘yiladi. Ertalab uyqudan turgach, olinadi. Shunda miopiya bilan xastalangan ko‘zning ko‘rish darajasi 100 foizga tiklanadi. Bu kun bo‘yi yurishga yetadi. Kechasi yana ko‘zlarga qo‘yish kerak bo‘ladi. Bunday linzalar miopiya o‘sishini to‘xtatadi. Agarda bolalardan gadjetni olib qo‘ya olmas, texnik progressni to‘xtata olmas ekanmiz, yangi innovatsiyalar orqali muammoga yechim izlashimiz lozim”, — dedi oftalmolog.
Maʼlum qilinishicha, tungi linzalar ko‘rish o‘tkirligini taʼminlab, miopiya o‘sishini to‘xtatadi yoki 85 foiz holatda xastalik rivojlanishini sekinlashtiradi.
Izoh (0)