O‘zbekistondagi maktablar kuz-qish mavsumiga tayyormi?

Oliy Majlis Qonunchilik palatasi Fan, ta’lim, madaniyat va sport masalalari qo‘mitasining 8-sentabr kuni bo‘lib o‘tgan yig‘ilishida maktablarda kuz-qish mavsumiga tayyorgarlik ko‘rish borasida olib borilayotgan ishlarga ham to‘xtalib o‘tildi.

Yig‘ilishda qo‘mita a’zolari muhokamalar chog‘ida kuz-qish mavsumiga tayyorgarlik ko‘rish borasida olib borilayotgan ishlar holati yuzasidan mutasaddilardan izoh so‘ragan.

Vazirlik vakillarining ma’lum qilishicha, ayni paytda 10 104 ta umumta’lim maktablari mavjud bo‘lib, ulardan 486 tasi markaziy isitish tarmog‘i orqali 9 467 tasi lokal isitish tarmog‘i, 151 tasi esa qo‘lbola pechlari orqali isitilishi uchun zarur choralar ko‘rilgan.

Ma’lumot uchun, “2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari to‘g‘risida”gi prezident qarorida issiqxona, qurilish materiallari ishlab chiqaruvchi korxonalardan tashqari 5407 ta ijtimoiy obyekt 2023-yilda ko‘mir yoqilg‘isiga o‘tkazilishi belgilangan.

Isitish tizimi tabiiy gazdan ko‘mir yoqilg‘isiga o‘tkaziladigan ijtimoiy obyektlarning 2 432 tasi xalq ta’limi obyektlaridir. Xususan, Toshkentda 20 ta maktab isitish ko‘mir yoqilg‘isiga o‘tkaziladi: Bektemir tumanida 4 ta, Mirzo Ulug‘bekda 2 ta, Sergelida 6 ta, Yangihayotda 5 ta va Yashnobodda 3 ta maktab. Buning uchun qo‘shimcha 600 tonna ko‘mir talab etiladi.

2022-yilda O‘zbekistondagi mavjud maktablarning 7111 tasi ko‘mir yoqilg‘isi yordamida isitilgan.