“2023-yil kuz-qish mavsumiga tayyorgarlikni hozirdan boshlaymiz” – Energetika vaziri o‘rinbosari

2023-yil kuz-qish mavsumi uchun tayyorgarlik ishlarini hozirdan boshlash zarur. Bu haqda Energetika vaziri o‘rinbosari Sherzod Xo‘jayev bugun (22-dekabr) bo‘lib o‘tgan Oliy Majlis Qonunchilik palatasi yig‘ilishida ma’lum qildi.

Sherzod Xo‘jayevning aytishicha, eng katta xatolardan biri kuz-qish mavsumiga tayyorgarlik ishlarini issiq mavsumda boshlanishi bilan bog‘liq bo‘lmoqda.

“Keyingi yilgi kuz-qish mavsumiga tayyorgarlikni hozirdan boshlashimiz kerak. Yillar davomida yo‘l qo‘ygan xatolarimizdan biri – kuz-qishga tayyorgarlikni issiq mavsumda boshlashimizda. Oqibatda muammoli nuqtalardan bo‘lgan ijtimoiy soha obyektlarini ko‘mir bilan ta’minlash va isitish tizimini barqaror ishlashi, elektr va gaz ta’minoti tizimlarini barqaror ishlashini real sharoitlarda tekishirishning imkoni bo‘lmaydi.

Ijtimoiy soha obyektlarini joriy kuz-qish mavsumidagi muammolarini o‘rgangan holda keyingi yil kuz-qish mavsumiga tayyorgarlik bo‘yicha alohida dastur ishlab chiqiladi.

Ijtimoiy soha obyektlariga joriy kuz-qish mavsumi uchun 518 ming tonna mahalliy ko‘mirni 1-noyabrgacha yetkazib berish vazifasi qo‘yilgandi. Bu hajmdagi ko‘mir mahsulotlari yetkazib berildi. Lekin haqiqatan joylarda mana shu ko‘mirlarni yoqish orqali binolarni isitishda ko‘plab muammolarga guvoh bo‘lyapmiz. Shuning uchun keyingi yil kuz-qish mavsumiga tayyorgarlik ishlarini hozirdan boshlaymiz.

Yana bir ahamiyatli jihat shundaki, aholini suyultirilgan gaz va mahalliy ko‘mir bilan ta’minlash masalalari alohida nazoratga olingan. Bu yerda hajm nuqtayi nazardan ayrim majburiyatlar yuklatilgan. Shu bilan birga, yetkazib berilayotgan suyultirilgan gaz va ko‘mirning chakana narxlari bugungi birjada ko‘rishimiz mumkin bo‘lgan ulgurji narxlardan ancha arzon. Bu tartibga solingan narxlar hisoblanadi”, – dedi vazir o‘rinbosari.

Majlisda Moliya vaziri o‘rinbosari Ahadbek Haydarov 2022-yilda ijtimoiy soha obyektlarining kuz-qish mavsumiga tayyorlash ishlari uchun mahalliy budjetlardan 770 milliard so‘m mablag‘ ajratilganini aytdi.

“Shundan joriy ta’mirlash tadbirlariga 550 milliard so‘m mablag‘ ko‘zda tutilgan. Bevosita ko‘mir sotib olish uchun 187 milliard so‘m mablag‘ ajratildi”, – dedi u.

Ahadbek Haydarovning qo‘shimcha qilishicha, 2023-yilda ijtimoiy soha obyektlarining kuz-qish mavsumiga tayyorlash ishlariga yanada ko‘proq mablag‘ yo‘naltiriladi.

“Kelasi yilda bu tadbirlarga mahalliy budjetlardan jami 862 milliard so‘m ajratiladi. Buning ichida maktablar va bog‘chalardagi qozonxonalarni ta’mirlash yoki almashtirish uchun beriladigan mablag‘lar ham bor. Masalan, bunday ta’mir ishlariga 2022-yilda 34 milliard so‘mga yaqin mablag‘ ajratilgan bo‘lsa, kelgusi yilda 50 milliard so‘mga yaqin mablag‘ yo‘naltiriladi. Ko‘mir birinchi navbatda ijtimoiy soha obyektlariga yetkaziladi”, – dedi vazir o‘rinbosari.

Majlisda 2022-yilda sog‘liqni saqlash obyektlarini elektr energiyasi bilan uzluksiz ta’minlash uchun respublika budjetidan 48 milliard so‘m mablag‘ ajratilgani ham aytib o‘tildi.