Yevropa Ittifoqining 26 davlati Ukrainaga yordam berish uchun qo‘shimcha badal to‘lashga tayyor

Yevropa Ittifoqining Vengriyadan tashqari barcha davlatlari Ukrainaga yordamni davom ettirish uchun budjetga qo‘shimcha badal to‘lashga tayyor.

Bu haqda Yevrokomissiya rahbari Ursula fon der Lyayen ma’lum qildi.

“Yevropa komissiyasi iyun oyida Yevropa Ittifoqi budjetini mustahkamlashni taklif qilgandi. Albatta, buning birinchi ustuvor yo‘nalishi Ukrainani qo‘llab-quvvatlash, shuningdek, migratsiya va raqobatbardoshlikni oshirish bo‘ladi. Yevropa Ittifoqining 26 ta davlati qo‘shimcha budjet mablag‘larini berishga kelishib oldilar”, — dedi fon der Lyayen.

Uning ta’kidlashicha, Yevropa Komissiyasi yangi mablag‘ olish bilan birga, YIning mavjud dasturlarida mablag‘larni qayta taqsimlash bo‘yicha ham qarorlar qabul qiladi.