Korrupsiyaga qarshi kurashish agentligi tomonidan haj ziyoratiga boruvchi fuqarolar ro‘yxatining xolis va adolatli shakllantirilishi hamda ochiq eʼlon qilinishi o‘rganildi. Bu haqda agentlik matbuot xizmati xabar berdi.
Qayd etilishicha, agentlik ishchi guruhi tomonidan Vazirlar Mahkamasining 364-son qarori bilan tasdiqlangan haj va umra tadbirlarini tashkil etish va o‘tkazish tartibi to‘g‘risidagi nizom talablarining ijrosi Urganch shahri va Urganch tumani misolida o‘rganilgan.
Hokimliklar huzuridagi haj va umra tadbirlarini tashkil etish va o‘tkazish masalalari bo‘yicha Tashkiliy guruh tomonidan jamlangan maʼlumotga ko‘ra, haj tadbiriga borish uchun Urganch shahridagi jami 40 ta mahalla fuqarolar yig‘inidan 3 141 nafar, Urganch tumanida esa 60 ta mahalla fuqarolar yig‘inidan 2 279 nafar fuqarodan arizalar kelib tushgan.
O‘rganish davomida fuqarolarning o‘zini o‘zi boshqarish organlari tomonidan shakllantirilgan ro‘yxat asosida ziyoratchilarni yagona navbat tizimida ro‘yxatdan o‘tkazib borish holati tahlil qilingan. Shuningdek, ziyoratga borish istagidagi fuqarolardan kelib tushgan arizalarni belgilangan tartibda hokimlikdan ro‘yxatdan o‘tkazish, ularni ko‘rib chiqish natijalarini fuqarolarga rasmiy maʼlum qilish amaliyoti ko‘rib chiqilgan.
Ishchi guruh tomonidan ziyoratga borish istagini bildirgan fuqarolardan arizalarni qabul qilish, ro‘yxatdan o‘tkazish va tuman-shahar miqyosidagi jamlangan ro‘yxatni shakllantirishda bir qator xato va kamchiliklar aniqlangan.
Ta’kidlanishicha, Korrupsiyaga qarshi kurashish agentligi tomonidan haj tadbiriga borish uchun navbatda turgan ziyoratchilarning yagona onlayn navbati to‘g‘risidagi maʼlumotlarni Ochiq eʼlon qilinishi kerak bo‘lgan ijtimoiy ahamiyatga molik maʼlumotlar ro‘yxatiga kiritish taklifi ilgari surilmoqda.
O‘zbekiston fuqarolari uchun haj kvotasi
2023-yilda O‘zbekiston fuqarolari uchun umumiy haj kvotasi 15 ming nafar etib belgilandi. Bu yilgi haj mavsumi uchun kvota 12 mingdan 15 ming nafarga oshirilgani qayd etildi. Keyingi yillarda mamlakatdan haj safariga boruvchilar sonini bosqichma-bosqich oshirib borish rejalashtirilgan. Har bir ziyoratchiga to‘lov miqdori jamoatchilik kengashi qaroriga asosan 68 million 760 ming so‘m etib belgilagan edi.
Izoh (0)