Qashqadaryo viloyati Shahrisabz tumanida 14 yoshli qiz yetti oy davomida majburan saqlanib, turli shaxslar bilan jinsiy aloqa qilishga majburlab kelingani aytilmoqda. Bu bo‘yicha 24-noyabr kuni bolalar ombudsmaniga murojaat kelib tushgan.
Ma’lum qilinishicha, bolalar ombudsmaniga Kitob tumanida yashovchi voyaga yetmagan CH.T.ning murojaati kelib tushgan. Unga ko‘ra, 2009-yilda tug‘ilgan bu qizni 2023-yilning may oyidan 15-noyabr kuniga qadar Shahrisabz tumani “Xo‘jabog‘” qishlogida yashovchi fuqaro N.A. o‘zining uyida 7 oy davomida majburan saqlab kelib, zo‘rlik va tahdid orqali turli shaxslar bilan jinsiy aloqa qilishga majburlagan.
Bolalar ombudsmani mazkur holatni zudlik bilan o‘rganish va voyaga yetmagan CH.T.ga nisbatan jinoiy harakatlar sodir etgan shaxslarga qonuniy chora ko‘rish to‘g‘risida Bosh prokuraturaga murojaat qilgan.
Viloyat prokuraturasi shu kunni o‘zida hodisani o‘rgangan. Kitob tumani prokurori tomonidan fuqaro N.A.ga nisbatan Jinoyat kodeksining 135-moddasi 3-qismi “a” bandi bilan (odam savdosi, voyaga yetmagan shaxsga nisbatan) jinoyat ishi qo‘zg‘atilib, tergov guruhi tuzilgan va tezkor ravishda tergov harakatlariga kirishilgan.
Bolalarga nisbatan bunday mudhish jinoyatni sodir etgan har qanday shaxs qonun oldida javob berishi shart. Jinoyat ishi Bosh prokuratura va Bolalar ombudsmanining alohida nazoratida. Bu og‘ir jinoyatning qurboni bo‘lgan bolaning manfaatlari to‘liq ravishda taʼminlanadi. Hodisa yuzasidan qo‘shimcha maʼlumot beriladi, — deyiladi bolalar ombudsmani xabarida.
May oyida Toshkent viloyati Yangiyo‘l tumanida yashovchi 19 yoshli yigit 10 kun davomida voyaga yetmagan qizni bo‘sh uyda saqlab, uni o‘zi bilan jinsiy aloqa qilishga majburlab kelgani ma’lum bo‘lgandi.
Izoh (0)