Xorazm viloyati Bog‘ot tumanida tabiiy gazdan 650 million so‘m qarzi bor tadbirkor issiqxonasi tarmoqdan o‘chirilganidan shikoyat qildi. Bu haqda “Hududgazta’minot” AJ axborot xizmati xabar berdi.
Xabarga ko‘ra, yuqori turuvchi organlarga Xorazm viloyatida issiqxona faoliyati bilan shug‘ullanuvchi ayrim tadbirkorlar tomonidan tabiiy gaz yetkazib berilmayotgani va tarmoqdan uzib qo‘yilgani haqida murojaat bo‘lmoqda. Xususan, F.Maxmudova “Reditus” MCHJga qarashli issiqxonaning 2023-yil 1-noyabr kuni holatiga ko‘ra tabiiy gazdan 650 million so‘m qarzdorligi mavjud bo‘lsa-da, tarmoqdan ajratilganidan norozi bo‘lib asossiz ravishda murojaat qilgan.
Bog‘ot tumanlararo iqtisodiy sudining qaroriga ko‘ra, “Reditus” MCHJdan “Hududgazta’minot” foydasiga tabiiy gaz haqini undirish haqidagi ijro hujjatlari mavjud bo‘lib, qarzdorga tegishli mol-mulklar xatlangan va hozirda ijro harakatlari olib borilmoqda.
Ma’lum qilinishicha, Xorazm viloyatida tabiiy gaz bilan ta’minlanadigan 179 ta issiqxona mavjud. Mazkur issiqxonalarning 100 tasi bo‘yicha 22.11.2023-yil holatiga 50,6 mlrd so‘m debitor qarzdorligi mavjud bo‘lib, undiruv harakatlari olib borilmoqda.
Izoh (0)