Diniy qo‘mita haj safariga yuborayotgan firmalardan ehtiyot bo‘lishga chaqirdi

Din ishlari bo‘yicha qo‘mita haj safariga yuborayotgan firmalardan ehtiyot bo‘lishga chaqirdi. Bu haqda qo‘mita axborot xizmati xabar berdi.

Ta’kidlanishicha, hozirgi paytda ijtimoiy tarmoqlarda haj safariga yuborish to‘g‘risidagi reklamalar ko‘paymoqda. Ayrim firmalar umra, ziyorat yoki biznes viza bilan haj qilishni va’da qilmoqda.

Ma’lum qilinishicha, Saudiya Arabistonida haj amallarini bajarish uchun sizda “Haj-2023” vizasi bo‘lishi shart. Podshohlik tomonidan belgilangan tartibga muvofiq chet el fuqarolari uchun haj ibodatini ado etishning asosiy sharti haj vizasiga ega bo‘lish hisoblanadi.

“O‘zbekiston uchun ajratilgan haj kvotasi faqatgina Din ishlari bo‘yicha qo‘mita va O‘zbekiston musulmonlari idorasi tomonidan tashkil etiladigan haj safariga otlangan ziyoratchilarga ajratilgan, shunday ekan, ayrimlarning O‘zbekiston orqali haj safariga jo‘natamiz, degan aldovlariga uchmang.

Ular fuqarolarimizni boshqa davlatlar orqali noqonuniy tarzda olib ketishga urinishmoqda. Bu esa qonuniy asosga ega bo‘lmagan va haj tashkil etishga vakolati yo‘q kimsalarning urinishidir. Kezi kelganda aytib o‘tish kerakki, bu kabi xatti-harakatlar Saudiya Arabistoni Podshohligi va O‘zbekiston Respublikasi qonunchiligida qat’iy chora ko‘rilishiga sabab bo‘ladi”, — deyiladi bayonotda.