Farg‘ona viloyatida umra ziyorati uchun yo‘llanma tayyorlab berishni va’da qilib, fuqaroni chuv tushirgan shaxs qo‘lga olindi. Bu haqda IIV axborot xizmati xabar berdi.
Qayd etilishicha, Toshkent shahar IIBBga ariza bilan murojaat qilgan fuqaro Telegram orqali suhbatlashgan noma’lum shaxs unga 25 dona umra ziyorati uchun yo‘llanma tayyorlashni taklif qilib, bank kartasiga 20 ming 50 dollarni o‘tkazib olgan. Biroq u bergan va’dasini bajarmay yashirinib yurganini ma’lum qilib, ushbu shaxsga nisbatan qonuniy chora ko‘rishni so‘ragan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tezkor qidiruvlar davomida pullarni o‘zlashtirgan shaxs aniqlandi.
1996-yilda Farg‘ona viloyatida tug‘ilgan, Oltiariq tumani hududida yashovchi shaxs qo‘lga olinib, tergovga jalb qilingan. Hozirda ushbu shaxsning Toshkent shahri hududida sodir etilib, fosh etilmasdan qolgan boshqa shu turdagi jinoyatlarga aloqadorligi tekshirilmoqda.
May oyining boshida Din ishlari bo‘yicha qo‘mita O‘zbekiston fuqarolarini haj va umra amallarini bajarishda turli reklama va e’lonlardan ehtiyot bo‘lishga chaqirgandi. “Muborak safarlarga noqonuniy yo‘llar bilan borishga intilish Saudiya Arabistonidan deport qilish va Saudiya Arabistoniga har qanday viza bilan 10 yil muddatga kirishni taqiqlash hamda 100 000 saudiya riyoli (26 ming AQSH dollari) miqdorida jarima solishga olib keladi”, — deyilgandi ogohlantirishda.
Fevral oxirlarida Toshkentda Umraga borish uchun aviachipta olmoqchi bo‘lgan 50 kishi aldangani, Andijonda Umraga bormoqchi bo‘lganlarning 1,4 mlrd so‘mini o‘zlashtirgan shaxsga jinoyat ishi qo‘zg‘atilgani to‘g‘risida xabar berilgandi.
Izoh (0)