“Jamoat xavfsizligini taʼminlash sohasida ovchilar jamoat birlashmalari faoliyatini sifat jihatidan yangi bosqichga ko‘tarish chora-tadbirlari to‘g‘risida”gi Vazirlar Mahkamasi qarori qabul qilindi.
Hujjat bilan Ovchilik nazoratining jamoatchi inspektori to‘g‘risidagi namunaviy nizom tasdiqlangan bo‘lib, unga ko‘ra:
- jamoatchi inspektorlarning faoliyati adliya organlarida davlat ro‘yxatidan o‘tkazilgan ovchilar jamoat birlashmalari tarkibida tashkil etilishi mumkin;
- inspektorlar soni ovchilar birlashmalari sonidan va ularning joylashuvidan kelib chiqib belgilanadi;
- inspektorlar o‘z faoliyatini jamoatchilik asosida amalga oshiradilar, ular bilan mehnat shartnomasi rasmiylashtirilmaydi va ish staji hisoblanmaydi;
- inspektorlar vazifalarni bajarishga faqat ish joyidan bo‘sh vaqtlarida jalb etilishi mumkin;
- ariza 30 kun ichida ovchilar jamoat birlashmasi rahbarlik organi tomonidan Ekologiya vazirligi O‘rmon xo‘jaligi agentligi hamda ichki ishlar organlarining vakillari ishtirokida ko‘rib chiqiladi;
- ariza qanoatlantirilganda shaxsga 3 yil muddatga tegishli guvohnoma beriladi.
Jamoatchi inspektorning asosiy vazifalari:
- tabiatni muhofaza qilishga maʼsul davlat organlarini, shuningdek, ovchilik birlashmalarini, tabiatdan foydalanish sohasidagi huquqbuzarliklar haqida xabardor qilish;
- sohadagi huquqbuzarliklarning oldini olish va aniqlashga qaratilgan, tabiatni muxofaza qilishga masʼul inspektorlar tomonidan o‘tkazilayotgan patrullik reydlarida ishtirok etish;
- huquqni muhofaza qiluvchi organlarni chegaroldi hududlardagi begona va shubhali shaxslar haqida xabardor qilish.
Shuningdek, quyidagilarni belgilovchi Quroldan xavfsiz foydalanish qoidalariga o‘qitish bo‘yicha qisqa muddatli maxsus o‘quv kurslari to‘g‘risida nizom tasdiqlanmoqda:
- kursga qabul qilish;
- o‘quv dasturi xajmini belgilash;
- tegishli guvoxnoma berish;
- kurslarni tamomlagan shaxslar reyestrini yuritish.
Hujjat Qonun hujjatlari maʼlumotlari milliy bazasida eʼlon qilingan va 2023-yil 21-noyabrdan kuchga kirdi.
Avvalroq Surxondaryoda 17 bosh yovvoyi qum tovushqonini ovlagan brakonyerga chora ko‘rilgani, Toshkentda bedana ovlaganlar jarimaga tortilgani, O‘zbekistonda 2022-yilda 18 mingdan ortiq jonivorni ovlashga ruxsat berilgani to‘g‘risida ma’lum qilingandi.
Izoh (0)