O‘zbekistonda 2022-yilda 18 mingdan ortiq jonivorni ovlashga ruxsat bergan. Bu haqda “Ekolog” Telegram-kanali xabar qildi.
Unda aytilishicha, qo‘mita raisi Narzulla Oblomurodov 2022-yil 10-maydagi 181-son buyruq bilan 18 141 dona yovvoyi jonivorlar va 8 dona O‘zbekiston “Qizil kitob”iga kiritilgan kamyob va yo‘qolib borayotgan yovvoyi jonivorlarni ovlashga qaratilgan kvotaga imzo chekkan.
“Jamoatchilikning doimiy e’tirozlariga qaramasdan yovvoyi hayvonlarni muhofaza qiladigan tashkilot tomonidan ovlanishga kvota berilayotgani juda ham achinarli. 2021-yil mart oyida Qo‘mitaning sobiq raisi Alisher Maqsudov tomonidan ruxsat etilgan ‘Qizil kitob’ga kiritilgan qo‘ng‘ir ayiq voqeasidan qo‘mita rahbari saboq olmagan ko‘rinadi”, — deb yozmoqda kanal muallifi.
Ta’kidlanishicha, 18 141 dona jonivor ovlashga kvota berilgan bo‘lsa-da, amalda bu raqam bir necha baravar ortiq ovlanishini kuzatish mumkin.
O‘zbekistonda faoliyat olib borayotgan bir guruh ekolog va ekovolonterlar bilan, xususan “Ekologuz” jamoasi tomonidan yovvoyi hayvonlarni ovlashga moratoriy joriy etilishi taklifi bildirilgan. Ammo mazkur taklif Ekologiya va atrof-muhitni muhofaza qilish davlat qo‘mitasi, O‘rmon xo‘jaligi davlat qo‘mitasi, Ovchilar uyushmasi, Ov xo‘jaliklari bilan shug‘ullanadigan tashkilotlar tomonidan qo‘llab-quvvatlanmagan.
“Biz mazkur holatni kechirilmas xato deb hisoblaymiz. Yovvoyi tabiatga qilingan shafqatsizlik jamiyatga qilingan shafqatsizlikdir”, — deyiladi xabarda.
Izoh (0)