Surxondaryo viloyatida noqonuniy ravishda hayvonot dunyosiga zarar yetkazganlarga chora ko‘rildi. Bu haqda viloyat ekologiya boshqarmasi matbuot xizmati xabar berdi.
Qayd etilishicha, 20-oktyabr kuni Surxondaryo viloyati Ekologiya boshqarmasiga nomaʼlum shaxs tomonidan yovvoyi qum tovushqoni ovlangani aks etgan rasm kelib tushgan. Ushbu maʼlumotga asosan ekologik surishtiruv o‘tkazilganda rasmda aks etgan fuqaro Angor tumani “Xomkon” mahallasida yashovchi N.X. ekani aniqlangan.
Tegishli hujjatlar asosida o‘rganishlar davomida fuqaro N.X. Angor va Muzrabot tumanlari hududida 2022-yilda ruxsatnomasiz, tungi vaqtda olti bosh, 2023-yilda 11 bosh qum tovushqonini ov qilish muddatlariga zid ravishda taqiqlangan usul, yaʼni tungi yoritish moslamasi bilan ovlagani ma’lum bo‘lgan.
Ushbu holat yuzasidan birlamchi hujjatlar tayyorlanib, fuqaroga nisbatan Maʼmuriy javobgarlik to‘g‘risidagi kodeksning 90-moddasi 4-qismiga asosan maʼmuriy jarima belgilangan.
Ta’kidlanishicha, Fuqaro N.X. tomonidan 2022-yilda 6 bosh qum tovushqonini ovlashi oqibatida tabiatga 5 million 400 ming so‘m, 2023-yil 14-oktyabr kuni 11 bosh qum tovushqonini ovlashi oqibatida esa 10 million 890 ming so‘m, umumiy hisobda 16 million 290 ming so‘m zarar yetkazilgani maʼlum bo‘lgan.
Mazkur holat bo‘yicha to‘plangan hujjatlar qonuniy chora ko‘rish maqsadida Jinoyat ishlari bo‘yicha Sherobod tuman sudiga yuborilgan.
Izoh (0)