Toshkent shahri hokimi Shavkat Umurzoqov 2023-yilning 23-noyabr kuni “Otalar choyxonasi”, “Uch avlod uchrashuvi” va “Buvijonlar maktabi” kabi oylik tadbirlarni o‘tkazish va “bir piyola choy” tashkil qilish uchun budjetdan 10 mlrd so‘m mablag‘ ajratdi. Bu haqda hokim qarori qabul qilingan.
Hokimlikning ma’lumot berishicha, ushbu qaror “Keksa avlod vakillarini har tomonlama qo‘llab-quvvatlash hamda ularning ijtimoiy faolligini oshirishga doir qo‘shimcha chora-tadbirlar to‘g‘risida”gi prezident qarori, Xalq deputatlari Toshkent shahar Kengashining qarori va Vazirlar Mahkamasi topshirig‘i ijrosini ta’minlash maqsadida qabul qilingan.
Xalq deputatlari Toshkent shahar Kengashining “Toshkent shahar mahalliy budjetining 2022-yildagi qo‘shimcha manbalarini xarajatlarga yo‘naltirish haqida” 2022-yil 22-apreldagi qarori bilan “Nuroniy” jamg‘armasi Toshkent shahar bo‘limi tomonidan har oyda “Otalar choyxonasi”, “Uch avlod uchrashuvi”, “Buvijonlar maktabi” va boshqa shu kabi uchrashuvlarni tashkillashtirish, shuningdek, “bir piyola choy ustida suhbatlashish”, taqdirlash va boshqa tadbirlarni o‘tkazish uchun 10 milliard so‘m mablag‘ ajratilganligi inobatga olinsin, — deyiladi poytaxt hokimi imzo chekkan qarorda.
Unda shuningdek, shahar hokimligiga mazkur tadbirlarni tashkillashtirish va taqdirlash maqsadida qo‘shimcha ravishda Toshkent shahar mahalliy budjetining shu yilgi ikkinchi chorak daromadlari rejasini oshirib bajarilgan qismidan 500 million so‘m mablag‘ taqsimlanishi belgilangan.
Shahar hokimi qarori bilan Toshkent shahar hokimining birinchi o‘rinbosariga taqsimlangan mablag‘ni ijrosi bo‘yicha Xalq deputatlari Toshkent shahar Kengashiga hisobot tarzida kiritish hamda ajratilgan mablag‘larni “Nuroniy” jamg‘armasining Toshkent shahar bo‘limiga o‘tkazib berilishini ta’minlash vazifasi yuklatilgan.
Izoh (0)