Andijon, Buxoro va Surxondaryo viloyatlarida tegishli hujjatlari bo‘lmagan hamda kuchli taʼsir qiluvchi dori vositalarining muomalaga kiritilishiga chek qo‘yildi, deb xabar beradi Bosh prokuratura huzuridagi departament.
Qayd etilishicha, departament, DXX va IIB Andijon viloyati boshqarmalari tomonidan hamkorlikda Oltinko‘l tumanida tezkor tadbir o‘tkazilgan. Tadbirda fuqaro B.Q. boshqaruvidagi Damas rusumli avtotransport vositasi to‘xtatilib ko‘zdan kechirilganda, fuqaro I.M.ga tegishli hech qanday hujjatsiz 1 200 dona “Pantozol” nomli xorijda ishlab chiqarilgan dori vositasini o‘tkazish maqsadida olib ketayotgani aniqlangan. Shuningdek, fuqaro I.M. Andijon shahri “H.” MFYdagi xonadonida ushbu dori vositasidan yana 3 799 donasini sotish maqsadida saqlab kelayotgani ma’lum bo‘lgan.
Shu kabi, departamentning Kogon shahar va Samarqand tuman bo‘limlari tomonidan DXX va IIB xodimlari bilan hamkorlikda o‘tkazilgan tezkor tadbirlarda “M.F.” MCHJga qarashli dorixona sotuvchisi S.SH. hamda “S.D.” xususiy korxonasiga qarashli dorixona sotuvchisi Z.T. hech qanday hujjatsiz jami 410 dona “Tebantin” va “Gabapentin” nomli dori vositasini sotayotgan vaqtida ushlanib, yana 640 dona “Tebantin” nomli dori vositasi ashyoviy dalil sifatida olingan.
Xuddi shunday, departamentning Surxondaryo viloyat boshqarmasi, Qiziriq tuman bo‘limi tomonidan DXX xodimlari bilan hamkorlikda o‘tkazilgan tezkor tadbirlarda “B.G.” MCHJ, “J.F.” va “P.N.” xususiy korxonasiga qarashli dorixona sotuvchilari jami 201 dona “Tebantin” va “Gabapentin” nomli dori vositalarini sotgan vaqtlarida ushlanib, yana 100 dona “Tebantin” dori vositasi ashyoviy dalil sifatida olingan.
Departamentning Jarqo‘rg‘on va Oqqo‘rg‘on tuman bo‘limlari tomonidan IIB xodimlari bilan hamkorlikda o‘tkazilgan tezkor tadbirlarda esa “D.Ph.” MCHJ rahbari O.A. va fuqarolar L.G‘., J.N. jami 107 dona “Zardeks” nomli kuchli taʼsir qiluvchi dori vositasini sotayotgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Bundan oldin Sirdaryoda psixotrop dorilar savdosi bilan shug‘ullangan shaxslar qo‘lga olingani, DXX Tojikiston va Qirg‘izistondan keltirilgan giyohvand moddalar savdosi bilan shug‘ullanuvchi shaxslarni ushlagani, Toshkent viloyatida o‘tkazilgan nazorat-reyd tadbirlarida sintetik giyohvand vositalarini tayyorlovchi laboratoriya tashkil qilgan shaxslar qo‘lga olingani to‘g‘risida xabar berilgandi.
Izoh (0)