Tojikiston hukumati 2024-yilda Rog‘un GES loyihasini amalga oshirish uchun qariyb 5 milliard somoniy (taxminan 460 million dollar) ajratmoqchi. Bu haqda mamlakat moliya vaziri Fayziddin Qahhorzoda mamlakat parlamenti quyi palatasi deputatlariga ma’lum qildi.
“Respublikaning 2024-yilgi davlat budjeti to‘g‘risida”gi qonun loyihasi taqdimotida vazir Rog‘un GES qurilishiga markazlashtirilgan budjet mablag‘lari hisobidan 2,8 milliard somoniy, investitsiya loyihalari hisobidan yana 2,2 milliard somoniy yo‘naltirish rejalashtirilayotganini aytdi.
U 2023-yilning o‘n oyida Rog‘un GES qurilishiga 4,3 milliard somoniy (395 million dollarga yaqin) mablag‘ ajratilganini ta’kidladi.
Rog‘un GES qurilishi hozirgacha faqat davlat mablag‘lari hisobidan moliyalashtirilmoqda. 2008-yildan buyon mazkur GES qurilishi uchun davlat budjetidan 35 milliard somoniydan ortiq mablag‘ ajratilgan.
2022-yilda Jahon banki tomonidan muvofiqlashtirilgan Rog‘un GES qurilishiga xalqaro donorlar mablag‘larini jalb qilish bo‘yicha konsorsium tuzildi.
- Moliya vazirligi maʼlumotlariga ko‘ra, Osiyo infratuzilma investitsiyalari bankidan 500 million dollar miqdorida imtiyozli kredit jalb etish bo‘yicha kelishuvlarga erishilgan.
- Bundan tashqari, Islom taraqqiyot banki ushbu obyektni moliyalashtirish hajmini avval e’lon qilingan 150 million dollardan 250 million dollargacha oshirish niyatida.
- Oktyabr oyi oxirida Saudiya taraqqiyot jamg‘armasi ham 100 million dollar kredit berishga tayyorligini ma’lum qilgandi.
Izoh (0)