Saudiya taraqqiyot jamg‘armasi Tojikistondagi Rog‘un GES qurilishiga 100 million dollar ajratadi. Bu haqda Saudiya Arabistonining Dushanbedagi elchisi Valid ibn Abdurahmon ar-Rishaydonga tayanib, “TASS” xabar berdi.
Tegishli summa 2002-yildan buyon jamg‘arma tomonidan Tojikistonga ajratgan barcha mablag‘larning 50 foizini tashkil qiladi. Elchi Rog‘un GES qurilishi mintaqadagi eng yirik loyiha bo‘lib, “tabiiy resurslardan, jumladan, yashil energiyadan samarali foydalanish orqali mamlakatni barqaror rivojlantirish jarayoniga katta hissa qo‘shishini” taʼkidladi.
Tojikistonda Saudiya taraqqiyot jamg‘armasi tomonidan moliyalashtirilgan 195 million dollarning 95 million dollari ta’lim sohasiga yo‘naltirilgan. Xususan, 2023-yil oktyabr oyida Tojikiston Moliya vazirligi va jamg‘arma o‘rtasida “Tojikistonda maktablarni qurish va jihozlash” loyihasini moliyalashtirish bo‘yicha 20 million dollarlik shartnoma imzolangan.
Tojikiston energetika vazirining maʼlum qilishicha, Rog‘un GESni butunlay ishga tushirish uchun 5 milliard dollar miqdorida mablag‘ kerak bo‘ladi. Hozirgacha ushbu suv elektrostansiyasi uchun 40 milliard somoni (3 milliard 336 million dollar) sarflangan.
Rog‘un GES
Rog‘un GES Dushanbedan 110 kilometr uzoqlikda Vaxsh daryosida joylashgan bo‘lib, mintaqadagi eng yirik hisoblanadi. Uning qurilishi 1976-yilda boshlangan, ammo SSSR parchalanganidan so‘ng to‘xtatilgan.
Keyinchalik Tojikistonda GES qurilishi davom ettirilgan, loyihada ko‘zda tutilgan 600 megavatt quvvatga ega olti blokdan hozirgacha ikkitasi ishga tushirilgan.
2008-2021-yillarda Rog‘un GESni rekonstruksiya qilish, qurish va o‘rnatish uchun Tojikiston byudjeti va boshqa manbalar hisobidan qariyb 3 milliard dollar ajratilgan. U ishga tushirilgandan so‘ng stansiyaning quvvati 3,6 gigavattni tashkil qiladi va balandligi 335 metr bo‘lgan to‘g‘on dunyodagi eng baland to‘g‘onga aylanadi.
Izoh (0)