Тожикистон ҳукумати 2024 йилда Роғун ГЭС лойиҳасини амалга ошириш учун қарийб 5 миллиард сомоний (тахминан 460 миллион доллар) ажратмоқчи. Бу ҳақда мамлакат молия вазири Файзиддин Қаҳҳорзода мамлакат парламенти қуйи палатаси депутатларига маълум қилди.
“Республиканинг 2024 йилги давлат бюджети тўғрисида”ги қонун лойиҳаси тақдимотида вазир Роғун ГЭС қурилишига марказлаштирилган бюджет маблағлари ҳисобидан 2,8 миллиард сомоний, инвестиция лойиҳалари ҳисобидан яна 2,2 миллиард сомоний йўналтириш режалаштирилаётганини айтди.
У 2023 йилнинг ўн ойида Роғун ГЭС қурилишига 4,3 миллиард сомоний (395 миллион долларга яқин) маблағ ажратилганини таъкидлади.
Роғун ГЭС қурилиши ҳозиргача фақат давлат маблағлари ҳисобидан молиялаштирилмоқда. 2008 йилдан буён мазкур ГЭС қурилиши учун давлат бюджетидан 35 миллиард сомонийдан ортиқ маблағ ажратилган.
2022 йилда Жаҳон банки томонидан мувофиқлаштирилган Роғун ГЭС қурилишига халқаро донорлар маблағларини жалб қилиш бўйича консорсиум тузилди.
- Молия вазирлиги маълумотларига кўра, Осиё инфратузилма инвестициялари банкидан 500 миллион доллар миқдорида имтиёзли кредит жалб этиш бўйича келишувларга эришилган.
- Бундан ташқари, Ислом тараққиёт банки ушбу объектни молиялаштириш ҳажмини аввал эълон қилинган 150 миллион доллардан 250 миллион долларгача ошириш ниятида.
- Октябрь ойи охирида Саудия тараққиёт жамғармаси ҳам 100 миллион доллар кредит беришга тайёрлигини маълум қилганди.
Изоҳ (0)