Tojikiston prezidenti Xitoyga davlat tashrifi davomida 17-may kuni Pekinda Osiyo infratuzilmaviy investitsiyalar banki raisi Jin Lisun bilan muloqot qildi. Uchrashuvda mazkur bank Rog‘un gidroelektr stansiyasining yangi agregatlarini ishga tushirish uchun 500 million dollar mablag‘ ajratishi maʼlum bo‘ldi. Bu haqda Tojikiston prezidenti matbuot xizmati xabar berdi.
Respublika rahbari Emomali Rahmon Osiyo infratuzilmaviy investitsiyalar banki raisiga minnatdorlik bildirib, mazkur bank Tojikiston uchun ishonchli sherik ekani, bugungi muloqot kelgusi hamkorliklarni yanada kengayishiga turtki bo‘lishini ta’kidladi.
Ushbu uchrashuvda tomonlar yashil infratuzilma, transport, energetika, kommunal xizmatlar va shaharlarni obodonlashtirish sohalariga sarmoyalar ajratish bo‘yicha ham fikr almashdi.
Osiyo infratuzilmaviy investitsiyalar banki moliyaviy xalqaro tashkilot bo‘lib, Xitoy tomonidan taʼsis etilgan. Mazkur bank Osiyo va Tinch okean mintaqalaridagi infratuzilmalarni yaxshilash, aeroportlar, yo‘llar, kommunikatsiya stansiyalarini bunyod etish kabi loyihalarga sarmoyalar ajratadi.
Eslatib o‘tamiz, bundan oldin Rog‘un GESga qaratilgan loyihalar ijrosini taʼminlash uchun Islom taraqqiyot banki joriy yilning 14-fevralida 150 milllion dollar ajratgandi.
Tojikiston energetika vazirining maʼlum qilishicha, Rog‘un GESni butunlay ishga tushirish uchun 5 milliard dollar miqdorida mablag‘ kerak bo‘ladi. Hozirgacha ushbu suv elektrostansiyasi uchun 40 milliard somoni (3 milliard 336 million dollar) sarflangan.
Choryor Avliyozoda, Dushanbe
Izoh (0)