“Teskari o‘girilgan Jenni” nomi bilan mashhur bo‘lgan noyob pochta markasi Nyu-Yorkdagi auksionda rekord darajadagi 2 million dollarga sotildi.
1918-yilda chop etilgan matbaa xatosi bo‘lgan markani 76 yoshli kolleksioner Charlz Xek sotib oldi, deb yozadi The Washington Post.
Markada pochta biplani oyog‘i osmondan qilib tasvirlangan. Xato aniqlanguncha bu markalardan atigi 100 tasi chiqarilgan va o‘shandan beri badavlat filatelistlar bir paytlar 24 sentga sotilgan markalarni katta pulga qaytarib sotib olishmoqda. Charlz Xek Qo‘shma Shtatlardagi filatelistlar orasida rekordchiga aylandi.
Kecha “Titanik” kemasining birinchi klass yo‘lovchilari uchun kechki ovqat menyusi nusxasi Buyuk Britaniyadagi Henry Aldridge va Son kimoshdi savdosida 84 ming funt sterlingga (taxminan 102,769 dollar) sotilgandi.
Menyuda 1912-yil 11-aprel sanasi aks etgan. O‘sha kuni kechki ovqatga laynerdagi yo‘lovchilarga ustritsa, mol go‘shti, qo‘zichoq va o‘rdak go‘shti berilgan. Sotilgan menyuda suv belgilari bor. Nusxa tarixchi Len Stivensonning 1960-yillardagi fotoalbomida topilgan.
Izoh (0)