Tuvalu davlati cho‘kmoqda, Avstraliya boshpana taklif qildi

Tinch okeanida joylashgan Tuvalu orol davlati cho‘kmoqda, uning aholisi Avstraliyaga ko‘chiriladi. Bu haqda Associated Press xabar berdi.

Avstraliya iqlim o‘zgarishi oqibatida dengiz sathining ko‘tarilishi va kuchayib borayotgan bo‘ronlar oqibatlarini yumshatishda Tuvaluga yordam taklif qildi. Avstraliya bosh vaziri Entoni Albaneze tuvaliklarni qutqarish rejasini e’lon qildi. Bu har yili 280 kishini Avstraliyaga jo‘natib, barcha orol aholisini bosqichma-bosqich ko‘chirish imkonini beradi. Tuvalu 11 ming aholiga ega ekanini hisobga olsa, “evakuatsiya” 40 yildan ozroq vaqtni oladi.

“Biz Tuvalu aholisi boshqa joyda yashash, o‘qish va ishlash huquqiga loyiq deb hisoblaymiz, chunki global iqlim o‘zgarishining salbiy ta’siri kuchayib bormoqda”, — deydi Entoni Albaneze.

Tuvaliklarni ko‘chirishdan tashqari, Avstraliya orol mamlakatining okean tomonidan so‘rilishini sekinlashtirishi kerak bo‘lgan ishlarni moliyalashtirishga, shuningdek, tabiiy ofatlar yuz berganda Tuvaluga yordam berishga va’da berdi. Tuvalu aholisi avtomatik ravishda Avstraliya fuqaroligini olmaydi, ammo keyinroq bu bo‘yicha so‘rov yuborishlari mumkin.

The Guardian nashrining yozishicha, Avstraliya qaroriga Tinch okeani orollari vakillarining tanqid darajasini biroz pasaytirish istagi sabab bo‘lgan bo‘lishi mumkin. Ular Kanberrani Tinch okeani mintaqasida iqlim o‘zgarishiga qarshi yetarlicha kurashmayotganlikda ayblamoqda, masalan, Avstraliyada neft va gaz qazib olishni cheklashni xohlaydi.

The New York Times gazetasiga ko‘ra, bunday saxovatli taklif Avstraliyaga so‘nggi paytlarda Tinch okeanidagi orol davlatlar, masalan, Solomon orollari bilan aloqalarni rivojlantirishga faol harakat qilayotgan Xitoyga qarshilik ko‘rsatishga yordam berishi kerak.